2017年8月25日星期五

迷你冬甩

今日整左D迷你冬甩, 話說我地上次整左D窩芙, 發現原來跟機仲有個整迷你冬甩版, 所以今日又試試. 這個食譜我只跟左一半分量, 已經可以做到三十個. 而且如果下次再做, 糖份可以再減少D, 我覺得比較甜左D. 大仔就喜歡, 反而小B就麻麻地, 真奇怪. 😁


  • 125g plain flour
  • 150g caster sugar
  • 1 tablespoon baking powder
  • 1 egg
  • 120ml milk
  • 1/2 teaspoon vanilla extract
  • 4 tablespoons vegetable oil

2017年8月24日星期四

淮山杞子花膠湯 <智能高速煲>

忙左一個星期, 終於有時間煲湯, 今日煲淮山杞子花膠, 用上次係西貢買既花膠仔加雞肉同瘦肉煲這個湯. 個湯好味道, 其實我以前好少食湯渣, 不過生完兩個後, 個人又吾同左. 今次加左紅蘿蔔, 個湯又甜D. 早上放料, 中午食飯就飲得, 小B仲坐定定等飲湯添.😘
材料: 杞子, 淮山, 蜜棗, 花膠, 紅蘿蔔, 雞肉, 瘦肉

2017年8月19日星期六

法國斗牛犬 <羊毛氈 French bulldog >

上次講到的全身羊毛氈狗狗, 就係朋友仔睇左我隻斗牛犬狗狗, 所以找我幫手. 這個斗牛犬係我第一次跟相整真狗, 這隻狗狗好可愛架, 但我未做過狗狗, 所以要求只做個頭熱熱身, 好彩只做頭, 有顏色全身狗難道好高, 自己真係未勝任. 好彩完成品都ok, 第一次做自己都滿意. 🤗 

2017年8月17日星期四

木瓜雪耳無花果瘦肉湯 <智能高速煲>

見到街市木瓜幾靚又買番個黎煲湯, 木瓜我喜歡伴雪耳, 想熱飲, 所以加左瘦肉同無花果, 仲有南北杏. 用高速煲, 快靚正, 足足有兩公升湯水, 好味. 😋
我最近因為新高速煲, 所以一個星期都煲三, 四次湯水, 發現我家有個小粉絲. 就係小B啦. 佢好撐場喔, 煲左咁多次湯只有一次吾飲 (因為個次D芫茜味太重, 大仔都吾飲, 明白既, 我細個都吾喜歡芫茜味) 其他湯水小B次次飯後都飲一碗架, 連碗底D湯渣都吾怕, 次次清乾淨. 
現在有個湯腳, 我可以有動力継續一星期三, 四日有靚湯飲啦! 😁


2017年8月16日星期三

焗雞Roast Chicken <智能高速煲>

上個週末係超市買左隻雞, 因為高速煲中有個食譜話可以焗全隻雞, 所以買左隻大約1 kg既細中雞試試. 個高速煲得三公升, 隻雞差不多放吾入, 好彩最後都ok焗到. (加左400ml雞湯同煮) 隻雞係熟既, 不過雞胸比較乾, 可能煮時間太長, (我今次煮左25分鐘) 下次試下用春雞, 同時間再短D, 可能效果好D. 
隻雞太大, 我地分左幾餐, 第一餐食西餐, 之後煮意粉, 整三文治, 今晚食炒飯, 終於清晒隻雞. 我地好少買咁大隻雞, 通常買雞扒多, 少功夫又啖啖肉嘛. 😁


2017年8月14日星期一

黑色拉布拉多犬 Black Lab dog

最近的羊毛氈手作, 係一隻黑色的拉布拉多犬. Q版動物就做得多, 全身真狗真係第一次. 其實係朋友仔見到我做的一件手作品, 之後再找我問我可否幫佢隻拉布拉多犬做一隻羊毛氈
( 因為佢隻狗已經十二歲多, 而且身體有毛病, 朋友仔吾知狗狗可以支持幾耐. 佢囡囡又在外面讀書, 時時掛心住狗狗, 所以朋友仔想有隻羊毛氈狗陪伴囡囡身邊)
因為未做過全身狗, 加上係黑色, 對我黎講真係難度挑戰, 用左好多時間同參考, 眼珠塗上棕色及光油, 俾朋友仔過目, 佢話嘴邊要白色, 所以再補充同加上口及舌頭, 終於完成. 可惜羊毛氈狗狗係黑色, 好難用相機影到, 真身靚過相好多. 現在已經寄出給朋友仔, 希望佢喜歡啦!😘




2017年8月13日星期日

芫茜魚片湯

記得細個牙肉痛時, 媽咪就會煲芫茜皮蛋魚片湯, 因為下火, 對牙肉腫痛, 清熱氣有幫助. 覺得起身牙肉吾係咁舒服, 所以走去買左芫茜同魚片, 諗住煲湯. 回家先醒起無皮蛋, 所以打電話問媽咪點煲這個湯, 太耐無飲 ( 細個飲得多, 自己煲都係第一次) 飲完真係幫到手, 舒服好多呢!

2017年8月12日星期六

臘腸蒸雞飯 <智能高速煲>

老公話想食蒸飯, 咁不如試試個新高速煲做吾做到先?
一於整簡單D, 就臘腸蒸雞啦!放D餸係生米上面一齊煮, 飯好食得, 方便又快趣, D飯仲吸收晒D雞汁, 好味道呀! 吾知下次整咩蒸飯好呢?心思思想食排骨飯同窩蛋牛肉飯呢!😍

2017年8月11日星期五

蜜瓜雪耳豬肉湯 <智能高速煲>

有新高速煲玩, 所以日日試新野, 今日煲左蜜瓜雪耳豬肉湯. 走左去超市買過細蜜瓜, 我都係第一次用蜜瓜煲湯, 聽就聽得多. 用左個高速煲, 一個小時多D完成. 好香喔!我好喜歡食雪耳架, 不過個高速煲細, 得三公升, 所以只係放左半個雪耳. 試味後, 個湯好清甜啊!我吾放鹽都ok, 飲完好舒服啊, D蜜瓜仲好食添, 有下次. 🤗
材料 : 蜜瓜 , 紅蘿蔔 , 雪耳 , 豬肉, 果皮 (預先浸軟, 去囊)
 , 鹽 , 蜜棗 , 南北杏 , 薑, 水 1.5公升




2017年8月10日星期四

西洋菜羅漢果豬肉湯 <智能高速煲>

仔仔們病左, 今日連我都有D咳, 快快趣煲番D湯水飲先, 家中有羅漢果, 就煲西洋菜羅漢果豬肉湯.  今次用高速煲整, 好方便呀, 上午放料, 下午回來已經煲好. 好意外, 小B好喜歡飲, 以為佢會怕黑麻麻, 會吾飲添. 小B仲飲左一碗, 叻叻. 👍🏻
現在寫低個食譜, 下次可以再煲過, 這個份量煲完連湯料剛剛有2 公升, 足夠我地一家四囗, 兩大兩細飲. 煲完, 再開蓋再煲多十分鐘, 完成 😘





材料:
  • 西洋菜 85克 
  • 果皮
  • 豬肉 一個
  • 紅蘿蔔(去皮切塊)1個 
  • 羅漢果 ½ 個 
  • 清水 1.5 公升 
  • 南杏(12克)1湯匙 
  • 北杏(5克) 1茶匙 
  • 蜜棗 2粒 
  • 薑 2至 3片

2017年8月9日星期三

老火湯<智能高速煲>

我本身好喜歡飲湯, 但大細老闆麻麻地, 次次都要我包尾. 而且用明火煲時間長又收乾好多水份, 所以我地家煲湯既次數好小. 😅
但現在有左這個智能高速煲就吾同啦, 因為真係好快同好方便. 今早去超市買左D豬展, 紅蘿蔔, 粟米同蘋果, 加左D百合, 南北杏, 陳皮,煲左個老火湯. 
以前煲湯大約三小時, 現在由放料到排氣, 都係一個小時十五分鐘就完成, 而且只流失少量水份,  這次煲湯水份完成後還有2 公升湯咁多. 
Bloggers 教排氣後再開蓋滾多十五分鐘, 等D湯濃郁些, 出來就似用明火一樣. 正!👍🏻
咁好用, 早知早D買啦! 😁

2017年8月8日星期二

智能高速煲

我地這個星期買左個智能高速煲, 其實係年頭已經想買, 不過個心十五十六, 因為有壓力煲功能, 怕危險, 所以遲遲未買. 原來這個智能高速煲有好多功能, 煲湯, 電飯煲, 魚, 肉, 意粉, 慢煮, 保溫. 時間設定, 可以上午出街, 下午回家有得食.
今日試左煲飯, 真係好快趣, 按飯鈕, 選六分鐘, 預熱加排氣只需要十五分鐘, 飯粒分明, 我自己覺得比電飯煲煮還好食.
食完晚飯再試下煲糖水, 試左薏米腐竹糖水(因家中有齊材料, 而且時間最短)
先放水 1L, 下20克薏米煲三分鐘, 再排氣. 下放腐竹用冰糖, 再煲二十分鐘. 完成 (其實食譜話煲三十至四十五分鐘會比較好, 不過今次D腐竹吾溶晒, 下次煲耐D試試)
個糖水好好味呀!如果用煤氣煲糖水一定最小一個小時, 好開心啊, 這個好好用, 明天再整其他野試試先. 😉




2017年8月5日星期六

翠玉瓜意粉 Courgett spaghetti

這個翠玉瓜意粉係外國網站已經有好多人介紹, 因為這是健康食品, 用蔬菜來代替澱粉質. 係呀, 我又要減肥了, 暫時未做運動, 所以想從飲食著手. 知道這個食品好耐, 今次係朋友介紹下試左煮這個. 我用水煮左一分鐘, 去水後再炒多4分鐘, 食前加蕃茄醬. 
其實網上教用水煮一分鐘已經可以食, 但我試味後覺得草腥味好勁, 所以再炒多4分鐘. 食後感, 又真係有少少似意粉, 因佢切到一條條, 我喜歡蕃茄醬拌勻一同食,  比較好食D, 無咁草味. 
有下次, 不過會自己買翠玉瓜切絲. 佢卡路里比較低, 100克只係20卡路里, 這個一大碟有250克, 即50卡路里, 飽肚, 自我感覺良好D.  😁

2017年8月3日星期四

小松鼠

最近做手作, 用毛冷鉤了隻小松鼠, 其實我原本想用羊毛氈做一隻小松鼠, 可惜太複雜, 為有下次啦. 這個好易鉤, 等小B午睡時先做, 所以用左幾日時間. 只跟圖做但用細一號的鉤針, 因不想太大隻. 尾巴就用羊毛氈, 方便又快趣. 👍🏻



2017年8月1日星期二

曲奇餅

同仔仔無野做, 最好既節目當然係整野食啦! 今日選左簡單既食物, 就係整曲奇餅啦! 😘
這個食譜係用來做聖誕曲奇既, 不過因為這個食譜簡單, 所以我常用的. 今次仔仔選左圓形模, 我就選左星型. 大約焗左9分鐘就完成, 放涼五分鐘等佢硬身, 再轉鐵架放涼. 
仔仔放左白朱古力上面做装飾, 不過可能火力太大, 燶左. 😝
其實我想玩玻璃曲奇, 不過家中無這款糖, 為有下次啦! 
這個曲奇餅好食, 我地食完一個又一個. 等我再找找櫃其他曲奇模再玩先. 😉


http://www.bbc.co.uk/food/recipes/christmasbiscuits_93733