2014年12月20日星期六

提早來的聖誕禮物

今日好開心同大家介紹, 我地第二個BB 出世啦, 係仔仔黎架, 因為佢係預產期早出世, 所以可以講係話我地一家提早來的聖誕禮物. 其實我係星期三時已經開始穿羊水, 所以安排左我入醫院, 但之後都未有陣痛, 到星期五早上感覺到強烈既陣痛, 每一分鐘痛一次, 轉左病房, 姑娘話已經開到四度, 可以準傋下一步.
所以立刻打俾老公, 但我的陣痛, 一次又一次強烈, 不到半小時已又四度轉到九度, 真係怕老公未到時BB就出世, 而且因為我係第二胎, 生產過程來得快, 所以我用不到其他止痛方法, 如gas,  其實姑娘有叫我用gas, 但我用吾到, 所以放棄左. 我想打針, 但度數已經開到九度, 打吾到針, 所以今次生第二胎係在無任何止痛方法下生, 對比第一胎, 我覺得辛苦左, 但時間就短好多. 第一胎大約用左五個多小時, 今次一個多鐘就生左啦.
仔仔早左一個月出世, 所以要特別照顧, 佢大約有4lbs9. 因為我係順產, check 過後今日可以出院, 但就要每日回來再覆診, 驗血壓同check 傷口. 所以遲D會更忙, 希望可以再update d 近況俾大家, 預祝大家聖誕節快樂, 新年進步! :)




2014年12月3日星期三

又到聖誕, 又到聖誕!

踏入12月, 又到聖誕節, 這個月將會好忙碌, 又要到學校幫手賣蛋糕, 現在懷孕, 到出世不遠了, 下個月就是, 所以有好多東西要準備. 見好多bloggers 都鉤一些應節東西, 我又玩下, 就係聖誕紅鼻小鹿帽啦. 這個pattern 好簡單, 對我這個初級班好易學. 我覺得這個鹿仔帽子好可愛, 紅色鼻子好特出呢! 


2014年11月28日星期五

花開富貴

哈哈, 未到新年, 點解我會話花開富貴呢? 因為我想介紹家中既蘭花啊, 這盆蘭花真係好勁, 新年時買回家, 都現在將近聖誕, 還継續有新花開, 這次係第三次開花啦. 今日睇仲見到有花蕊開添, 好開心, 之前我買左獎卷, 俾我中在hk200元禮金, 所以今次真係花開富貴呢. :)



2014年11月24日星期一

西洋菜蜜

記得以前細個, 秋冬時家人會俾西洋菜蜜我地飮, 但細個吾識寶, 不喜歡喝. 最近見Facebook 谷友post, 又另都我想試番杯.  這個真係好容易, 材料只要西洋菜, 蜜棗, 冰糖. 好味又潤, 不過仔仔就覺得麻麻地like, 但我兩公婆都喜歡, 凍熱都好味.


西洋菜蜜 6-8杯


材料:

西洋菜 1斤
蜜棗 3粒
冰糖 (我落左一個檸檬大細既份量)
水 12 碗


做法:
(1)    西洋菜浸鹽水約15分鐘, 洗淨備用
(2)    蜜棗洗淨
(3)    煲滾水, 水大滾後放西洋菜和蜜棗, 大火煲約半小時, 轉小火煲多1小時
(4)    大火滾起, 加冰糖調味即成



2014年11月3日星期一

Ben's cookies

上次去左倫敦旅遊, 行過見到間曲奇店排曬隊, 一於跟隨買一份, 一個曲奇大約£1.50-£1.75, 可以選一盒8個, £12.95或者一盒15個, £15.95. 價錢比較貴, 但真係好好食, 佢地既曲奇特別之處係軟身同用切大粒既朱古力餡, 新鮮出爐, D朱古力係融化的. 不過如果不喜甜可能會覺得太甜.

今日自己試整左兩樣, 一個係朱古力味曲奇同佢地出名既花生醬朱古力曲奇. 我自己比較喜歡花生味多D, 焗完香噴噴呢! 

這個食譜我做了18大件軟身曲奇, 因為只係焗9分鐘, 所以出爐後記得要放涼15-30分鐘. 如果想食軟身融化朱古力, 咁放涼既時間可以減短.

提提大家: 這款曲奇係軟身同比較甜的, 因糖已經300g, 仲要落朱古力入曲奇. 




200g/7oz unsalted butter, softened
300g/10.6oz caster sugar
1 egg
50g/1.76oz cocoa powder, sifted
300g/10.58oz self raising flour, sifted
Milk and dark chocolate chips, however much you like
Peanut butter chips, again however much you like
(Makes 24 cookies)
Method
Heat the oven to 190°C / 375°F degrees and line a baking sheet with baking parchment.

2014年10月13日星期一

自製雲呑~ 紅油抄手~

好耐無update個blog啦, 謝謝各位bloggers關心, 最近仔仔學校比較忙, 又多活動, 又要測驗溫書, 所以少左時間探大家, 希望遲D時間分配會好些! ^^

最近自己做左批雲呑, 有豬肉碎我通常會做水餃多, 好耐無食雲呑, 所以今次轉轉口味. 用來整紅油抄手, 加點醋, 好味呢, 仔仔又跟我食法, 一次過食左5隻添, 哈哈. :)


2014年9月25日星期四

簡簡單單

今晚簡簡單單煮左三個餸食飯, 一早醃定D排骨用來做豉汁蒸排骨, 今次蒸排骨我用保鮮紙包住, 真係無咁多倒汗水, 靚仔D. 

一個餸吾夠, 找找雪櫃有咩食材, 發現有個蕃茄, 一於整蕃茄炒蛋.

我好喜歡這個餸, 酸酸甜甜又開胃, 老公鐘意多汁, 今次加多D水, ok 喎, 好餸飯. 

炒多碟菜, 有肉有蛋又有菜, 好有營養啊, 啱曬我現在食呢! ^^


2014年9月24日星期三

三餸一湯

這兩日都好忙, 昨晚食完炆餸, 今晚仲簡單, 蒸兩個餸, 分別係燕麥蒸肉餅, 蒸水蛋, 跟手炒碟黃芽白, 上午一早煲落湯, 今次係蕃茄薯仔排骨湯, 最好味係個湯, 夠曬甜, 我仲食曬D湯料添, 哈哈. 


2014年9月23日星期二

茄汁牛腩飯

星期日同老公去買左D牛腩返黎, 好耐無食, 所以今日煲左一大盆. 用鮮茄加茄汁做湯底, 個味道係ok 既, 可惜D牛腩吾淋. 其實我已經分別煲左三次45分鐘, 之後焗15分鐘, 但都係失敗左. 

查詢谷友既見意, 原來要加冰糖, 我只用黑糖, 同要買合適牛肉, 下次再努力過! ^^


2014年9月22日星期一

齊既燥肉飯

今日係超市見到包齊免治豬肉平平地, 包裝話係豆製齊肉, 所以買來試試. 見議食法係用來整chill beans with mince, 但我吾想食辣, 上網找食譜, 可以當台灣燥肉飯煮法, 一於今晚食這個啦. 包免治肉好碎啊, 加左冬茹粒同炒, 又ok喎. 整多D, 留番明天午餐食. 仲有半包, 等我下次用來伴麵食先. 



2014年9月18日星期四

Tea time snack 小食時間啦~

今日整左個健康小食俾仔仔食, 就係芝士磨茹薄餅啦! 之前我同老公係街食過法國薄煎餅France crepe, 中間的餡有好多款, 甜, 咸都有, 加上去有成十多款. 我地選左咸點, 芝士磨茹, 大大份, 芝士又溶, 好好食. 

所以今日又自己試下, 個餅身我就無自己整, 因我仲未整到圓身餅底, 次次控制時間吾得, 所以我今次買左Wraps 墨西哥餅回來. 




1) 先炒熟磨茹,

2) 張餅身放在平底鑊上返熱, 

3) 加入磨茹同芝士放在一邊,

4) 將餅身返轉, 兩面脆身, 中間芝士又溶曬就完成啦! 

脆脆地, 芝士又香, 好正架. ^^

2014年9月17日星期三

小食~芝士餅~

又到仔仔學校食小食既時間啦, 今次係網上邊找到這個食譜, 可以做到20片中型size的芝士餅.

仔仔好喜歡食芝士, 有一個大牌子既芝士餅仔仔都好喜歡食, 但我睇左成份, 鹽份偏高喎. 所以都係自己試下整, 出來又ok 啊.

 我上個星期五整, 放入密實盒, 又無淋到喎, 仲係脆身同香香芝士味.




180g 牛油
180g 芝士碎
250g plain flour 中筋麵粉

焗180度, 15 分鐘

2014年9月16日星期二

芥菜排骨湯

上個星期六去買豬手時, 仲買左D排骨回來, 見芥菜幾靚, 就一於煲個芥菜排骨湯啦!

為左令到煲湯更甜, 我首先張排骨出水, 跟住放入油去煎下D排骨. 我又加左蝦乾, 出來煲湯真係好甜. 每人飲左兩大碗, 我就清曬D菜, 好食啊! 


2014年9月15日星期一

豬豬雞尾包

最近facebook見到這款麵種麵包, 所以又試下一齊整, 做左8個麵包, 4個豬仔做型, 4個細, 全部都係雞尾包餡, 因為仔仔喜歡食麵包店既雞尾包. 

麵包種先用麵包整好, 排氣滾圓後分四份, 可以放入雪櫃, 用時放在室溫就可以同麵包麵團一同拌勻, 放在冰箱可存放一個月.

點解有興趣試這個食譜, 就係因為個包包放三日依然軟熟. 不過我吾知這個方法得吾得. 


因為這批麵包一出, 我已經食左2個, 仔仔放學回來又食多2個, 佢話好食要帶番學校食同留番個做早餐啊, 所以只餘下2個俾老公試, 未放夠三日, 麵包就清曬, 家人仲order叫我明天再做, 好開心家人喜歡食, 自己又整得開心, 健康又好味. ^^




雞尾包餡料:


低筋粉 25g

牛油(室溫軟化)90g

幼砂糖 40g

椰絲 45g

奶粉 30g

麵種:


高筋麵粉 160g

水96g

快速依士2g 

食譜份量可做8個包包

麵種1份.

主麵團材料:

160g高筋粉.

砂糖20g

牛奶96g

蛋液24g

奶粉8g

依士4g

幼鹽1/2茶匙

牛油8g

2014年9月14日星期日

骨膠原啊!~

係blogger雀后http://kitva95.blogspot.co.uk/2014/09/blog-post_12.html

到見到佢整左骨膠原豐富既南乳炆豬手, 星期六立刻去肉檔買豬手回來試試. 家無花生, 又懶去買, 所以無落, 但出來一樣肉淋同皮Q彈, 仔仔都食左兩隻, 個汁送飯一流, 好好味, 仔仔超速食完餐飯, 哈哈. XD

只係準備豬手時功夫多些, 好彩老公幫手用火燒豬毛, 如果吾係都有排整, 多謝老公. ❤️

食完這個骨膠原, 好似飲左濃濃既花膠湯咁, 黏住個嘴呢! 這個平價骨膠原希望幫到D皮膚變靚D啦.. 嘻嘻~



2014年9月12日星期五

玉子豆腐

吾知大家喜歡食豆製食品嗎? 我就好喜歡, 好似豆腐, 豆漿, 豆腐花等等. 最近見到個食譜可以自家製玉子豆腐, 當然要試試啦!

材料: 無糖豆漿 250g, 4隻中型雞蛋


做法: 把4 隻雞蛋加入豆漿一起拌勻, 蒸10分鐘, 之後熄火焗15分鐘便成。


蒸完後, 立刻滾左個蕃茄豆腐蛋花湯, 試試個味道先. 好滑啊, 仲有蛋香既味道添.


所以我又整多盆, 遲D試下做其他餸先. :)


題外話, 原來玉子豆腐是用雞蛋做成, 因為口感似豆腐, 所以被人介類做豆腐. 含有雞蛋的豐富營養素包括蛋白質、鐵質、維他命B雜和必需脂肪酸,最適合成長中的小孩進食,幫助發育。


玉子豆腐也就是日本豆腐。「玉子」在日語中是雞蛋的意思,由於其原料中只有雞蛋,并没有大豆成分,所以這個玉子豆腐,就是雞蛋豆腐的意思。



2014年9月11日星期四

開飯啦!

開飯啦! 今晩整左三個餸, 有南乳薯仔炆豬肉, 炒黃芽白小棠菜同蕃茄炒蛋. 

我家以前都會煮蕃茄炒蛋, 但細個吾喜歡食蔬菜, 由其蕃茄, 因為吾鍾意入面D種子. 大個知道原來蕃茄好有營養, 而且煮法又多, 煲湯, 炒餸, 夾麵包, 沙津, 好多變化. 

今日煮返這個家常菜, 未做煮婦時, 吾識整這個小菜, 試過但都食吾番家常味道. 今日有谷友提點, 原來很簡單的, 所以想在此作記錄. 




做法:

1) 先炒蛋至半熟, 另外炒蕃茄至淋身

2) 加入蛋同炒, 加少許鹽, 少許糖, 1茶匙生抽拌勻, 完成. 

2014年9月10日星期三

香蕉pancake ~cake pop maker~

係Facebook 到見到朋友用香蕉整pancake, 覺得很特別. 所以今日買左香蕉試試, 出來既pancake 好香香蕉味, 食落好似香蕉蛋糕, 但就比普通pancake 軟綿得多.

今次做左一半用pan 整, 但個pancake 吾夠圓, 所以醒起可以用cake pop maker, 於是拿了出來, 做左批圓圓既pancake仔. 仔仔放學回來就食左半打, 佢話好食喎. 不過我估佢肚餓多D. 嘻嘻. 


野菜餅乾環

仔仔學校要求一些健康小食俾佢做茶點, 所以買左D生果俾佢帶回學校. 但仔仔反應一般, 所以上網找尋一些小食食譜, 有些係朱古力或花生醬做食材, 但學校建議帶健康食品. 見到這個餅乾用紅蘿蔔同香草做的. 以前仔仔細個好喜歡食紅蘿蔔, 但大個左就麻麻地, 想佢食多D蔬菜, 於是又整來試下. 

http://italltastesgreektome.blogspot.ca/2012/03/spinach-and-carrot-cookie-wreaths.html


這個份量可以做到30-35個, 但對我來說太多, 怕仔仔吾喜歡,所以只做了份量既一半, 吾知係咪我放不夠紅蘿蔔, 所以個顏色無食譜咁出. 但味道都OK, 我跟食譜再焗多次, 真係脆身D, 今日俾左幾片仔仔帶回去, 希望仔仔喜歡.




2014年9月9日星期二

成功啦 ~蒸水蛋~

以前見人煮蒸水蛋以為好易, 做左家庭煮婦後, 先發覺原來睇就易但做就難. 試過用好多方法, 好似保鮮紙包住碟, 蒸時用筷子留D空氣, 等佢吾會有倒汗水, 等等, 但都吾成功.

但睇到blogger袁太http://elanie-kitchen.blogspot.co.uk既做法, 現在交功課, 今晚整左蝦皮蒸水蛋! 老公食第一啖已經話好滑啊, 大讚好味又滑滑, 仔仔仲用行動來證明今次成功, 就係在半小時內食完飯, 真係好開心, 謝謝袁太. ^^

做法就係大火蒸二分半, 之後熄火焗十五分鐘, 真係好似食豆腐花咁滑呢. 


2014年9月8日星期一

中秋節晚餐

一年容易又中秋, 今日係中秋節, 於是整多小小餸過節, 三餸一湯. 原本想煮多D餸, 但想留肚食月餅同生果, 所以都係每様小小, 簡簡單單齊數4款算數. 

去超市買左D魚柳, 紅蘿蔔, 節瓜, 屋企有豆角, 拿錯左盒肉片當雞肉, 所以用左豉汁肉片炒豆角, 節瓜蝦皮粉絲, 粟米魚肉餅同蟲草花萍果湯, 這個湯係blogger介紹的, 好甜好潤. 節瓜粉絲中既蝦皮, 好意外仔仔話喜歡食, 但節瓜就麻麻地, 佢地吾喜歡, 所以整碟我自己一個清曬, 哈哈. 仔仔話要再食蝦皮, 好! 一於明天整蝦皮蒸蛋, 試試bloggers教的做法先.






2014年9月7日星期日

酥皮奶黃月餅

好開心啊! 星期六上午終於收到個月餅模啦, 晚上仔仔睡了, 就入廚房整酥皮奶黃月餅啦, 因為做到好夜, 又倦, 所以印完月餅就放曬入雪櫃雪左一晚, 今早先放入焗爐.Ok啦, D花紋無咁清, 但不是全部象腳, 味道都幾好食, 仔仔食完一個又一個, 我想叮熱番先食應該更好.


我們一家同小兔Mickey祝福大家中秋節快樂, 人月團圓!

我是跟這個做法的:

2014年9月5日星期五

豆沙鍋餅

之前做冰皮月餅餘下紅豆蓉, 一於整豆沙鍋餅先, 好耐無食過啦. 以前食上海菜一定會點這個甜品, 今次完成後都覺得幾好, 幼滑豆沙配上香脆外層, 非常香口. 這個份量可以做到4-5片.

材料:
豆沙  ....  適量
麵粉 (plain / all-purpose flour) ....  100 克
卡士達粉 (Custard powder)  ....  10 克
雞蛋  ....  1 顆
糖  ....  1 湯匙
水  ....  70克
椰汁  ....  80 克
鹽  ....  一小撮


2014年9月4日星期四

紅豆冰皮月餅

網上訂購了月餅模, 但還未到, 於是用了日本既雞蛋模做住冰皮月餅先. 這個雞蛋模幾好用架, 上年我做左朱古力冰皮月餅都係用佢, 細細個, 一兩啖就食曬啦! 個模大約有30g, 冰皮用了15g, 紅豆餡10g.


首先量好份量, 跟住搓圓備用, 再上糕粉入月餅模, 餅皮壓平包入餡料, 沾上少許糕粉收口向上放入模中壓實印出, 就完成這個可愛既兔兔月餅啦. 


2014年9月3日星期三

紅豆餡

今日做左D紅豆餡準備用來做冰皮月餅時用, 我用左300g熟紅豆(因為吾想煮紅豆, 但如果無, 可以自己煲紅豆). 其實我好怕煮紅豆, 時間太長, 見到超市有熟了既粒粒紅豆, 方便又易用. 我試過買現成紅豆蓉, 超甜, 都係自己整好, 可以控制糖份. 





做紅豆餡既材料有:


菜油  25g

澄粉  15g
糖      70g (我只用左50g, 我覺得都足夠)

做法:


1)先將熟紅豆攪拌成蓉, 跟住炒一炒, 之後加糖再炒至半乾( 糖會令紅豆餡變得水水)

2)加入菜油, 繼續炒
3) 最後加入澄粉同炒, 這時候紅豆餡會變得乾身, 炒到無粉粒便完成. 


2014年9月2日星期二

餃子兩食

見到如月同其他bloggers整餃子, 剛好家中有齊材料, 一於整餃子兩食. 今次用左西洋菜豬肉餃, 餡料仲加入麥皮, 令材料更豐富同滑. 上次餘下小量餃子皮, 所以只做了18隻, 一半做煎餃, 一半放湯作了我今日既午餐. 用了bloggers既方法去煎, 1.5匙麵粉加一碗水放入餃子中一起煮大約6-8分鐘便可. 今次我返轉餃子上碟時, 弄碎左個脆底, 但出來一樣好味, 煎餃係香口, 不過我自己喜歡放湯多D





2014年9月1日星期一

手打肉丸** 麵包機

星期日Facebook 既bloggers整左手打肉丸, 原來用麵包機都得架, 一於試下先. 我以前都整過手工肉丸, 但係用攪拌機加冰粒, 出來既效果不太理想, 肉丸散開, 口感不佳. 這次肉丸返而有彈性, 幾好味.



做法:

1) 豬肉碎放在保鮮袋中, 按薄一點, 放入冰格雪一小時至半結冰狀態.

2) 剝開一塊塊, 與盬一同放入麵包桶內.

3) 麵包機按入麵團程式, 開始攪打.

4) 15 分鐘後, 檢查一下肉團, 如有粒粒, 再攪拌多5 分鐘. 將調味料一併放入麵包機, 再開攪拌直至混合即停.

5) 取出肉團, 用保鮮紙包好放入雪櫃 (保鮮格, 不是冰格) 2小時或一晚.

6) 鍋內煲水至80度, 千萬不要滾. 取出肉團, 放入鍋中煮15 分鐘至浮起, 煮熟後立刻放入冰水內浸, 口感更佳, 完成後放入冰箱. 

2014年8月31日星期日

今日晚餐

今日整左咸酸菜肉片炒扁麵做晚餐, 又想飲湯水, 所以用紫菜滾肉片湯, 但我已經跟足食譜做法肉有醃, 滾後加盬同魚露, 但出來既效果還是差一點, 於是最後加了一粒濃湯寶, 味道好些, 但老公還是覺得差些味道, 請問你地如何煮紫菜湯呢? 



2014年8月29日星期五

奇華蛋黃奶皇

就快中秋節, 所以家人送些月餅給我們, 其中一款就係奇華既蛋黃奶皇月餅, 這個月餅細細個, 但好好味, 建議食法, 放入微波爐20秒, 好香啊. 連吾喜歡食月餅既仔仔都喜歡食, 就係因為這個原因, 我今日訂左月餅模, 希望趕得到中秋前完成我第一次酥皮奶黃月餅啦. ^^ 


好多謝家人仲送左包花膠螺片湯包, 湯味濃郁, 餘下既湯料如花膠, 螺頭切片, 我加入冬茹同豬脷一同炆, 又有一碟餸加料啦. :)

2014年8月26日星期二

章魚小丸子之cake pop maker

上次提到cake pop maker 除了可以做棒棒蛋糕外, 仲有這個, 當我見到部機時立刻有這個問號, 可以用來做章魚小丸子嗎? 原來真係得架. 好開心, 因為出來既效果好似同好好食. 仔仔第一次食, 佢都好鐘意, 一次食左六粒添. 等老公回來, 今晚既晚餐就係章魚燒伴雞肉炒烏冬同西洋菜湯. 我地食完晚飯後, 覺得吾夠口, 一於再整過, 又食多十二粒, 飽飽啦!

麵粉食譜:


  • 低筋麵粉200g
  • 全蛋1顆
  • 300cc
  • 1細匙
  • 1大匙
  • 白胡椒少許


可以加入其他食材, 如章魚, 腸仔, 魚蛋, 椰菜, 葱, 栗米, 芝士...

http://youtu.be/nFWPxbwsiL8

這個係用cake pop maker 做法既短片, 我都係跟佢做的, 但最後既時間我改左至1-2分鐘才轉小丸子一次, 令其顏色金黃D.

最初我只做了六粒試下個效果, 第一次, 一般, 再做就越來越好啦.




2014年8月24日星期日

蘭花

係近新年時影過盆蘭花, 好耐無同佢地影相, 兩盆蘭花已經由花蕊到現在開花啦! 兩盆蘭花都是同色紫色, 同樣這兩盆蘭花也是第二次開花, 所以見到佢地盛放, 睇見到好開心啊. 一盆有六朵花, 另一盆有九朵花. 少花個盆其實原先有更多花, 但上次放出去吹風時, 風太大而拆斷了, 好可惜. 蘭花既花期很長又美, 新年都現在還仲有花觀賞, 只係每個月掉些花兒. 上個月有一盆仲不斷生花蕊, 我想到聖誕還有花兒盛開. 感恩. ❤️



2014年8月23日星期六

飛碟三文治加壽司

這個星期中, 問仔仔想要食什麼做早餐, 仔仔話要食三角型多士, 諗左一陣, 原來仔仔係想食飛碟三文治, 於是把三文治機係櫃底找回來. 屋企無什麼材料, 一於用車打芝士碎加麵包. 熱力令芝士融化, 非常美味. 這部多士機我在N年前買回來的, 香港咖啡店會有好多口味, 有呑拿魚, 火腿, 芝士等等, 我喜歡加蕃茄仔同芝士一起食. 

下午有時間, 一於整仔仔鐘意既壽司做下午茶. 上星期仔仔話要食佢最愛既三文魚壽司. 出街食饀料又少, 自己整就大食夾抵啦, 包同切都吾係咁靚, 有待改進, 但自己食就不怕啦, 嘻嘻. 


2014年8月22日星期五

簡單兩味家常菜

今日整左兩個簡單家常菜作晚餐, 因為昨晚出左街食, 但又融左一餐雞肉同午餐食餘半舊义燒, 原本想整福建炒飯, 但見到bloggers煮雞肉照燒汁好吸引, 所以跟隨做了這個餸. 但食譜要有味啉同甜豉油, 兩樣也沒有, 所以用生抽, 老抽加黃糖整成汁料, 都好好味, 跟手加個洋蔥一起煮. 而义燒就用雞蛋炒, 變成滑蛋炒义燒, 今餐有肉有菜又有蛋, 半個鐘頭就完成兩味餸, 易煮食. :)

個雞肉照燒汁睇相好似好深色, 可能我今次用老抽重手左, 下次會留意番.



2014年8月21日星期四

Cake pop maker 棒棒蛋糕製作機

這個就是我的cake pop maker 棒棒蛋糕製作機既真身啦. 見其他bloggers係用baby cakes maker, 其實兩款也一樣的, 我喜歡白色, 跟我的多士爐同色, 而baby cakes 係紫色. 而且兩款maker 也是12個蛋糕一次, 做蛋糕既時間也差不多的.

其實除左cake pop maker 蛋糕製作機可以做棒棒蛋糕, cake pop mould 棒棒蛋糕模也一樣得, 不過我睇過評論麻麻地, 同平時焗cupcake 杯仔蛋糕既時間一樣, 但就做吾到蛋糕機既其他功能啦, 好似鬆餅pancake, 糖冬甩doughnuts等. 而且蛋糕機只要4至5分鐘就可以, 省時好多. 

部機焗出來係一個個小球, 大小就跟據你下多少粉團而定, 不過大約放八成滿, 多數蛋糕也會一樣大細.