聖誕愉快！

又到聖誕, 又到聖誕! 今年同小朋友一齊整左個食得既聖誕樹🎄, 就係酥皮朱古力樹啦！有得食又有得玩, 一舉兩得.👍🏻😊💖 祝福大家佳節愉快！

薯仔炆雞

我平常好少買薯仔, 見超市有減價薯仔, 就買左少少, 煮了這個久違既薯仔炆雞. 其實家人好少食這個, 上次見blogger煮, 先記起這個家常菜. 簡單易做, 又好味. 會再煮D先得👍🏻😍

鹽水浸雞

其實這個係我地家既家常菜, 每次見到有雞腿平, 就會買雞回來整, 其實用雞胸都得, 不過雞腿滑D, 同浸幾耐都吾鞋烚烚. 煮前一晚用鹽醃雞腿, 🐔第二日煮一大煲滾水, 放火薑, 蒜, 再放入肉, 大火煮十五分鐘, 之後細火煮多三十分鐘, 關火加蓋焗多三十分鍾，就食得啦, 非常簡單又好味💗. 我個仔同老公好喜歡這個菜式, 平常會煮一大煲浸雞, 淨番D雞湯用黎煲飯, 正😘

潛完水啦🤣

大家好嗎？我耐無寫文, 同探大家, 因為工作量比預期多左好多, 以前只係忙一個月, 今年反而忙足幾個月, 其實仲有工作在下月初做, 不過見今日有D時間, 快快手出文同大家打招呼😃
這個係我最近既羊毛氈手作, 近聖誕假期, 整隻企鵝🐧出來應節, 係女仔黎架💗戴著粉紅色頸布同聖誕花. 好想整多隻男仔企鵝🐧, 睇下遲D有無時間啦！！🤣

蘿蔔糕

上個星期六俾我見到有靚白蘿蔔, 立刻好想食蘿蔔糕, 所以就買左包粘米粉回家. 昨晚食完晚飯就開始整. 我今次只買左條中大蘿蔔, 已經整左三底長蒸盤. 😊
其實我整過好多次蘿蔔糕, 但我覺得次次都吾成功. 不過今次這個食譜出來好成功, 所以今次紀錄番, 下次想食又可以用. 昨晚整好立刻食蒸糕, 味道係ok 既, 不過今早再煎雪左一晩既蘿蔔糕, 香口又好味, 口感仲好似街買個款. 以後想幾時食都得啦！😍

白蘿蔔一大條 600~700克
水(加蘿蔔出水凈番既水) 700克
白胡椒粉 適量
鹽 適量
液態油 適量

臘腸 2 條

調味: 蠔油 2 湯匙, 生抽2 湯匙, 雞粉適量

粉漿水

粘米粉 500克

玉米粉 20克
水(量米杯3.5杯) 500克

雞肉丸之麵包機

上次見到bloggers 整肉丸, 其實我之前都試過, 不過吾成功, 太軟, 太淋吾彈牙. 俾我發現這個食譜加方法, 出來既肉丸非常彈牙. 就係用麵包機啦!! 方法係跟這個YouTube 麵包機肉丸 ,肉丸麵包機 好想快D試下牛丸, 貢丸, 同芝士丸呢！！😍

食譜: 免治雞肉500克
 調味: 
蠔油 2湯匙 
薑粉 1 茶匙
糖 1茶匙
鹽 2.5茶匙 
雞粉 1茶匙
生粉 2.5湯匙
白胡椒粉1/4茶匙
baking powder 3茶匙(寧多勿少)
水半杯 

鴨腎蠔豉咸瘦肉粥 之高速煲

最近小朋友開學, 午餐好想食粥, 所以找找雪櫃睇下有咩材料可以用, 俾我找到D鴨腎同蠔豉, 一於用佢地啦！加D咸瘦肉入粥, 用高速煲二十分鐘, 加自動排氣, 我返學校前放料, 去完超市買餸回家, 已經煮開, 好入味, 鹽都不用落, 又綿好好食. 👍🏻 

M

梅菜扣肉之高速煲

上星期終於有時候用高速煲試新菜式, 就係blogger芙芙介紹既梅菜扣肉啦！其實我街外食梅菜扣肉就多, 但自己整真係未試過, 見到芙芙既食譜, 真係心心眼😍 終於俾我買到D靚豬腩肉, 就立刻開工! 跟住芙芙既食譜, 加上高速煲既幫手, 好快煮到這個家常菜! 謝謝芙芙分享😘

窩蛋牛肉飯

這個星期四晚上, 見雪櫃有包免治牛肉, 原本想整茄汁牛肉飯, 因見好耐無食窩蛋牛肉飯. 於是整左蒸飯, 真係好耐無食過. 記得細個去酒樓食點心, 會有推車出來叫窩蛋蒸飯, 細細碗, 好好食架. 大老闆話要全熟蛋, 所以前後蒸多五分鐘. 加碟炒娃娃菜同煲番個老火例湯, 就係我地既晚餐啦！😋

燒腩仔

係blogger 到見到整燒肉, 跟阿爺廚房食譜整, 今次我第一次自己燒燒肉咋, 我老公整燒肉好叻架, 所以次次想食都係佢出馬既時侯. 大大話話應該有差不多一年無自己燒過. 所以當我見到做法不太複雜, 就自己膽粗粗試試啦！
出來既效果係好成功既, 皮脆肉嫩, 大仔知道晚餐食燒肉, 非常高興. 我都好開心. 又好味又好有成功感, 仔仔食完話想再食, 應該這個菜式好快會變家常菜啦！😘

蜂蜜檸檬蛋糕

係谷友到發現左這個食譜, 見家中有齊材料, 現在又暑假, 所以同細佬整下蛋糕啦. 做法容易又快手, 好似我這個初高玩就最合適啦！🍰 

全蛋2隻
砂糖20g
蜂蜜30g
低筋粉90g
牛油溶液40g
檸檬青1小匙


做法：

1)雞蛋加入砂糖用打蛋器打散，用電動打蛋器高速攪打至蓬鬆狀態

2)分二次篩入低筋粉以切拌方式攪拌均勻

3)加入蜂蜜拌勻，最後加入牛油溶液及檸檬青拌勻

4)倒入模中9分滿，放入已預熱焗爐170度焗約13-15分鐘

椰汁紅豆糕

因為上次整芒果糯米糍餘下椰汁, 所以就做左這個椰汁紅豆糕啦！其實我對中式糕點喜歡度無西式糕點多, 但這個紅豆糕係天氣熱時, 就特別好味. 煮法都是跟you tube 張媽媽食譜, 簡易清楚. 太好食, 已經整左第二次, 食左先記得影相... 哈哈😁

鬥牛狗

最新手作就係這個羊毛氈小品, 鬥牛犬啦. 其實之前都有做過一隻鬥牛犬, 見最近有時間嘗試做隻細狗仔, 自己都幾滿意, 覺得自己進步左, 一年既功夫無白費. 期待完成作品. 🐶🐾

芒果糯米糍

天氣熱, 見到芒果靚, 買左D番黎整芒果糯米糍. 做法都好易, 跟YouTube 既張媽媽整. 整完未雪食左兩個無加椰絲既, 都ok, 期待今晚宵夜時食雪凍個D。😍

叉燒湯麵+溏心蛋

最近行超市見豬頸肉幾靚, 所以買左幾舊回家焗叉燒. 原本想整叉燒碟頭飯, 不過想食麵, 所以轉左做湯麵. 咁不如整番隻溏心蛋, 🍳 扮下日本湯麵. 🍜係YouTube 跟通少整溏心蛋, 方法容易又成功, 大家可以試試👍🏻 https://m.youtube.com/watch?v=iRRRm0jL5e0 溏心蛋

新挑戰 - 小倉鼠

大家好嗎？最近想試新手作, 所以試試挑戰自己, 嘗試做左這隻羊毛氈小倉鼠🐹, 我跟短片教學, 所以自己今次都覺得ok. 原本教學係做太陽花子放中間, 不過俾我發現之前買既小餅乾, 襯在一起又幾得意喎！🍪

紅燒豆腐伴雞肉

其實我好喜歡食豆腐架, 不過次次都煮到碎曬, 試過加用生粉, 雞蛋上面先煎, 一樣碎曬. 原來有小撇步, 就係先燒熱個碢, 之後加油, 油熱才放入已印乾水既豆腐去煎(豆腐面不用加任何東西, 只要印乾水分就可以)這個方法係跟you tube 既張媽媽學. 今次我覺得已經算成功, 雖然有份都碎左, 下次會努力再試試. 😊

粟米肉粒飯

其實我中學才開始出外食午飯, 所以細個常去大家樂, 大快活個D快餐店食學生餐. 上星期煮飯時, 找到礶粟米蓉, 咁巧合家中有豬肉, 一於整番個快靚正碟頭飯, 又易煮, 又不用洗咁多碗. 仔仔仲要喜歡食添, Win win 啊, 哈哈. 😁

皮蛋瘦肉粥

上個週末起身想食粥, 早餐就吾夠時間整啦, 所以係雪櫃冰箱拿出之前醃左油既冰米, 加瘦肉同江瑤柱用壓力煲煲粥, 煮好後, 開蓋加皮蛋粒煮多陣, 炒個豉油王炒麵又係一個午餐. 快手又方便. 😊 用油醃米之後放入冰箱最少三小時才煲粥, 係電視節目教既, 這個方法煮出來既粥特別綿, 所以我冰箱一定整定D, 隨時煮都有得食. 💗

蜜糖焗雞腿

明天係五月, 時間過得真快. 又有兩個星期無發文, 工作最近比較忙, 不過忙係開心事, 等我快快發文先, 咪又生菇啦... 哈哈😂
最近買左D雞腿, 一半整鹽焗雞 (不過食完先想起忘記拍照) 一半整左蜜糖焗雞腿, 兩樣我喜歡蜜糖焗雞多D, 甜甜地好惹味, 餸飯正啊! 🍗

八寶粥

其實我之前吾喜歡食太多豆既食物,直至陀細仔時, 開始食過一次八寶粥, 就覺得味道又ok 喎！不過多數買現成, 最近俾我發現原來自已整都好容易, 買左D雜豆, 家中紅豆, 綠豆同生熟薏米, 放冰糖用壓力煲煮十八分鐘, 就食得. 😍我煮份量可以當兩餐. 昨晚煮完, 熱辡辡都好食, 今日由雪櫃拿出來, 凍食都幾好, 味道似街買, 自己整衛生又少甜, 會再整. 👍🏻

椰菜花米 Cauliflower rice

最近睇到食譜話介紹健康食品, 其中一款就係這個椰菜花米Cauliflower rice. 點解用椰菜花當米呢? 因為佢切碎左真係外型好似白米咁, 我切完放左入雪櫃, 家人都以為係白米. 😘介紹資訊話用椰菜來代替白米, 食少D澱粉質, 對減肥有幫助. 而且煮法簡單, 加鹽, 蒜粉, 少少豉油, 煮五分鐘, 再加餸 (今日係雞肉同磨菇), 出來效果ok 喎, 可能我喜歡食椰菜花, 💗等我再試多幾次, 用來做代餐都幾好既選擇, 不用次次食小米咁悶. 👍🏻 兩張相分別係白米同椰菜花米🍚

乾炒牛河同蘿蔔湯

最近買左包河粉, 一於整乾炒牛河, 自己煮少油D, 今次D牛肉靚, 好食. 見bloggers 煲蘿蔔湯, 我又試試, 用上排骨, 第一次煲, 好清甜, 下次有靚蘿蔔會再煲, 我想試整清湯腩呢！😋

羊毛氈小兔心口針

謝謝大家既鼓勵啊！我遲D會再試試挑戰我家小兔Mickey. 😍 最近做左好多羊毛氈, 我做得最多應該是小兔子. 🐰今日分享這個係一份義賣作品, 原因小朋友學校想要家長捐贈一些物品義賣, 所以見復活節, 就整左這個側面小兔, 加上小蝴蝶結同蕾絲背景, 出來自己都幾喜歡, 覺得好女孩子呢！希望學校喜歡啦！💗

羊毛氈小兔

大家好嗎？原來我好耐無出文, 之前忙加懶蟲上身.😂 今日一於出番D手作品相片分享, 就係羊毛氈小兔啦！🐰其實我想整番我家小兔Mickey 米奇既羊毛氈, 但實在太複雜, 對現在既我黎講有難度, 所以做隻雙色簡單D, 練習下, 有機會再試整Mickey. 💗 

中式食物

又黎整中式食物啦！上次見blogger 咪咪整雞包仔又想食, 所以見今個星期有時間就可以整啦! 好味又易整, 我同大仔食晒.😘 見仲有材料, 星期三下午又整多次, 不過今次整生煎包, 脆底香口, 好食. 👍🏻個晚食完晚飯好似仲想食野, 所以整左腐竹薏米糖水, 用壓力煲好方便, D薏米都無浸, 但都淋曬, 連D腐竹都溶晒, 咁大碗我一個人食晒, 家中大細老闆吾食, 好彩壓力煲可以煮一人份量. 日後幾時想食糖水都無問題啦！😍

瘦肉粥

最近好似作感冒咁, 又發冷又口淡淡, 好想食粥, 所以今日用左個壓力煲煲瘦肉粥. 
我昨晚用鹽醃左D豬肉, 加左江瑤柱同三分一杯米(俾一公斤水) 全部放入壓力煲煮左二十分鐘. 排氣後開蓋再煮多三分鐘, 食得. 我喜歡少少稀既粥, 今次第一次用壓力煲煲粥, D米開晒花, 食完粥覺得個胃暖左, 感覺好好多. 這個壓力煲真係好方便, 原來煲粥都得, 今晚又用佢煲靚湯, 細仔落order話要飲湯喎, 哈哈.😍遲D等我買D皮蛋回來整皮蛋瘦肉粥先😘

洋蔥雞肉炒米粉

其實我煮飯真係麻麻, 吾叻, 所以好時間都煮得好難食, 真係難為大細老闆. 😝 好似炒米粉, 我次次都炒到一pat pat, 黏住晒又淋. 但上星期俾我發現左個方法, 真係要多謝偉大既YouTube (哈哈😁) 秘密就係先燙面後炒.
做法: 1) 先沸熱水, 再放米粉, 煮滾後將水份瀝乾, 加蓋用餘温燜三分鐘, 先燙再燜, 米粉口感才Q.備用
2) 用另一個煲炒菜同肉, 加水, 再加米粉, 加蓋(中火燜兩分鐘)料炒香再燜, 米粉才會更入味
3) 炒勻, 加蓋關火再燜多一分鐘, 完成. 

出來效果真係好得, 米粉分明, 無黏爽口, 老公同我都大讚這個方法有效, 有興趣朋友仔可以試試. 👍🏻

上海炒年糕 (炒白粿)

新年菜其中一款就係上海炒年糕(炒白粿) 啦！其實我細個好怕食這個食物, 因家人煮過, 不過煮得吾好食, 所以見到都怕怕. 後來出街食過, 味道完全不同, 醬油味濃, 又軟滑QQ, 可口. 俾我買到包白粿干, 一於試試自己煮. 其實想買韓國年糕, 不過有blogger友話好大陣味, 所以買左這款要自己浸.

個包裝教浸24小時, 浸之前洗洗先. 今次用紹菜, 冬菇, 雞肉.
做法:
1) 先用熱水煮年糕 (出出水), 見有小小氣泡可以拿起, 再加小小油拌勻年糕, 防黏, 備用
2) 加油炒冬菇, 雞肉, 中途加入紹菜, 放鹽, 糖, 蠔油, 生抽, 老抽各一湯匙, 白胡椒, 薑, 蒜同炒, 再加一小碗水, 等菜煮淋
3) 加年糕同炒, 再加水 (水份量, 每250克年糕 伴400ml 水) 其實水多少好睇年糕牌子, 我今次就無跟足食譜, 自己加減. (今次加水太多, 所以最後要加生粉, 下次自己留意番)
4) 炒大約六, 七分鐘 (其實你見到D年糕好似出膠質咁就ok, 或者可以自己試下食舊係咪軟身, 熟未? )

太好啦！今次綜合多個食譜, 自己煮係好食既. 這個我今日既午餐, 我俾左少少細仔食, 佢都喜歡, 仲追著我問我要多D. 好開心啊, 因細仔對中式粉麵一向麻麻, 今次佢主動話食, 所以決定明天我兩午餐再煮多次, 現在係到寫低個食譜, 下次可以自己番睇先, 吾好意思, 今次太長. 你地又喜歡食炒年糕嗎？😘

臘腸炒飯加例湯

今個星期見bloggers 煮臘腸炒飯, 但家中無芥蘭, 只有西蘭花, 所以用菜莖炒飯, 一樣爽脆, 大仔好喜歡 (因為有臘腸)所以我覺得今次炒飯係成功既. 同埸煲左靚湯, 青紅蘿蔔排骨湯, 好味又滿足既一餐. 😘

羅漢齊

新年期間係YouTube 找尋食譜, 發現這個羅漢齊, 真係好多年無食過啦！記得兒時年三十晚踏入新年年初一十二時, 婆婆一定會整齊菜拜神同食齊(初一十五), 婆婆仲會炸粉絲, 大家食過未? 但人大左, 常懷念舊時, 所以決定今日煮, 回味一下. 
其實我中午個餐好少煮飯食, 多數煮麵, 三文治又一餐. 但咁巧合, 今日老公留在家, 所以用蒸爐煲左嘜米, 開始煮羅漢齊啦！
我跟張媽媽食譜煮, 但材料就無跟, 只是煮自己家有同喜歡吃的食物, 用南乳整, 食完覺得味道同我兒時食既一樣, 好開心, 原來好易煮, 以後會煮多D. 😘

古法年糕

祝大家人日生日快樂, 開開心心. 🎉💗

我今年做左兩次糕點, 第一個係奶皇椰汁年糕, 係好香椰子味, 不過我麻麻地喜歡這個口味. 

所以再做多底年糕試下, 但吾想再買椰汁, 見這個食譜話只要糯米粉, 片糖同水就可以, 一於試試. 睇片教要搓, 不過我無跟, 只是將所有材料拌勻就用中火蒸一小時, 之後放涼半小時就切黎煎. 我記得細個家人教用兩個方法煎年糕, 切完放年糕就咁煎到脆面,  另一個方法就係加蛋漿煎. 因為掛住以前既回憶, 所以分別用曬兩個方法做. 

食後感, 有蛋漿係易煎D同蛋味香D。

但我反而喜歡直接煎, 脆面食法, 吾知係咪因為食譜係古法年糕, 出來效果好煙un, 我覺得好食D. 其實我仲想整其他糕點, 不過家中大爺無人同我分享, 今次底年糕我當午餐食,哈哈. 😁 吾知大家食曬D糕點未呢？

材料: 

糯米粉 175克

片糖125克

水180克

恭喜發財!

祝大家狗年大旺, 花開富貴! 今早整左D發糕, 祝大家大富大貴, 恭喜發財! 🐶

祝福大家新年愉快! 花開富貴!

祝福大家新年愉快, 花開富貴! 🌺
好高興蘭花係這幾天開花, 祝大家狗年旺旺! 🐶

燉鮮奶

前幾日, 天氣凍, 好想食熱食, 見家中牛奶快過期, 所以試整燉鮮奶, 好快趣, 不用半小時就食得. 食完暖粒粒, 好正. 👍🏻

生日樹熊

最近自己同小B都病左, 加上工作量多左, 所以小左時間寫blog 同探大家. 現在補番近期手作品, 就係羊毛氈生日樹熊. 🐨我第一次整這款動物, 仲幫佢整個生日帽同手拿汽球🎉, 用左美圖, 第一次, 自己收貨啦！哈哈🎁

水餃

見bloggers 個個都整水餃食, 睇見都想食, 夜麻麻好肚餓添. 俾我發現雪櫃有一包現成水餃, 真係好似發現救星一樣, 煮左幾隻, 好滿足, 謝謝這份小碓幸. 😘

題外話: 小B最近學識用叉用匙進餐, 又大個仔啦！👍🏻而且食量仲多左, 暫時最喜歡食既食物係意粉💗 我已經好滿意, 因對比佢之前可以餐餐咩都吾食, 練仙咁, 現在由細半碗到食晒滿細碗, 做阿媽見到咁, 真係好開心.（同各位媽媽一齊加加油, 共勉之) 😊

雪菜肉片炆米粉

俾我找到包米粉, 見雪櫃有肉片, 一於整雪菜肉片炆米粉. 個包裝話係六人份量, 應該有多過四人份量(我放晒包米粉入水煮先知份量太多)所以有淨留番下餐. 
會再買這個米粉, 之前試過炆米粉好碎, 今次無事. 嘻嘻... 我其實喜歡湯米多D, 雪菜肉絲窩米, 好好食架, 可惜暫時未找到放湯米粉, 等我再找日尋寶先. 😉

雞蛋豆角炒雞柳

今晚煮左雞蛋豆角炒雞柳碟頭飯作晚餐, 時源係街市買菜, 見到有豆角賣, 所以買左份回家. 立刻想食豆角炒蛋, 想加D肉類, 所以今次伴雞柳. 🐔

吾知係咪太耐無食豆角炒蛋, 覺得今次好好食. 大仔仲好俾面, 清曬碟飯, 叻叻👍🏻 大仔食菜方便好左, 好多蔬菜都食, 但生果都係麻麻.

好消息, 現在最近小B食多左肉, 飯同意粉仲係主食, 已經進步左, 以前一有肉就吐. 這幾天仲識用叉吉D意粉食. 希望越來越好啦！😘

西蘭花炒雞柳

今晚食西蘭花炒雞柳, 這個餸已經係今個星期第二次煮啦！因為我地一家個個都好喜歡食西蘭花, 但上次煮時, 蔬菜份量太少, 我食吾夠喉, 所以今晚買朵大西蘭花再食過. 😁
以前我連花莖都會煮黎食( 無浪費) 但有了小白兔Mickey 後, 就自動變左俾佢食啦. 所以有時買菜都會留意下有無D蔬菜係可以兩食 (人同兔都有份) 好似紅蘿蔔, 頭尾同皮就分俾小兔. 大家都有得益又環保同省錢. 😘

蕃茄炆牛尾

上次買左包牛尾, 大約一公斤, 昨晚整左蕃茄炆牛尾, 以前炆牛尾比較多步驟, 現在有壓力煲簡單好多, 放晒所以材料, 等佢自己煮, 方便又快趣. 😍

牛面珠肉 Ox cheek

朋友俾左份牛面珠肉我, 未食或者聽過, 所以上網找左食譜, 今次用壓力煲煮, 用滷水包同白蘿蔔一同煮. 煮完出來, 質地似牛展, 但好淋, 而且D蘿蔔好似車仔麵個款咁, 好食, 下次又試試用炒時蔬伴牛面珠肉, 睇下好吾好食. 😋
題外話, 因我家個電飯煲壞左, 所以買左壓力煲回來代替(壓力煲其中一個功能就係煲飯同煲湯) 但我昨晚用左壓力煲煮牛肉, 所以用左個蒸爐蒸飯, 又ok 喎, 兩大兩細煮兩嘜米剛剛好, 讚, 仲粒粒分明又吾黏底. 👍🏻

蓮藕排骨湯

見到blogger EE煲蓮藕素湯, 咁巧合俾我係街市見到蓮藕, 咁一於又試試先. 因家中無素湯材料, 所以用排骨, 螺片, 細瑤柱, 赤小豆, 紅棗 (原本想煲章魚湯, 但吾知放左邊, 問老人家話用瑤柱都得, 真係幾好味)😋😘
最喜歡食湯渣個D蓮藕, 好耐無食啦, 細個吾識寶, 見到D湯黑麻麻就吾喜歡飲. 但小B相反, 好喜歡飲湯, 吾怕黑麻麻, 叻叻, 前前後後飲左三細碗. 我煲左兩公斤湯都一日清晒. 過兩日又再煲過先. 👍🏻

可麗餅

這個點心有個好美麗既名字, 叫可麗餅.💗 我本身吾知, 一向都叫佢做薄班戟。但有次行過咖啡店, 見到甜點餐單有這款餅, 中間加上士多啤梨, 奶油用朱古力醬, 外型好吸引, 可惜個日太飽無食到. 見今日得閒, 上網找食譜做餅底. 奶油, 士多啤梨都無, 所以只加砂糖, 味道都好吃, 小B仲食左三件, 目標係挑戰千層蛋糕. (不過要等等, 見谷友仔話有D難度, 心大心細添... 嘻嘻) 😝