新年快樂！

祝大家2017新年快樂, 身體健康, 日日開心! Happy new year, all the best wishes in 2017!

森林系列之小狐狸

其實自己一路都有做手作, 只是聖誕假期做左D一直想做既小東西. 其中一個就是這個森林系列的小狐狸.

這個小狐狸係用鈎針製成的心口針, 早在上年見到圖樣pattern 時已經想整番個, 可惜當時自己經驗不夠, 嘗試多次也不成功. 今年聖誕再做, 重複看了又看圖樣, 試了又拆, 終於完成, 自己都幾歡喜, 覺得幾適合秋冬時節. 🍁

自己想做既手作清單 to do lists 排到滿滿, 希望來年可以加油, 整多D手作小可愛出黎☀️

法式檸檬撻

聖誕假期前整左個甜點, 就係法式檸檬撻. 食譜有教整撻皮, 但我又懶蟲上身, 所以買左現成撻, 快趣又方便. 這個撻味道ok, 不過我個撻面整得吾平滑, 有小小扣分. 應該無下次, 因為大大個檸檬撻, 全家只有我一個人食, 父子們吾太好檸檬味甜點, 我分左三日先食得晒, 如果party 開派對大班人食應該幾好. 或者下次整朱古力撻可能多D粉絲 Fans. 😁

http://cookeys.presslogic.com/2016/11/29/article/11717/

聖誕禮物2

祝大家聖誕節快樂, 我地早早就出左去睇聖誕燈飾, 今年係小B第一次睇, 佢好驚喜, 好開心, 不斷嘩嘩聲咁叫, 知道佢好歡喜閃閃既燈飾, 大仔話要數數小B每次睇燈飾有幾多個曄, 大仔話太多, 多過百次喎, 哈哈. 😄

細個時父母一定會帶我地聖誕去睇燈飾, 每次睇都同小B反應一樣, 開心同嘩嘩聲, 覺得D燈燈好靚. 💗
講返送俾自己既聖誕禮物先, 仲有兩份, 第二份就係玻璃水杯, 家中也有五六隻水杯, 但尺寸太細, 想找隻高身D, 找左好耐都不合適, 一係太大, 一係個花紋吾靚. 最近俾我找到隻花紋印有美美既繡球花, 身型高身又瘦長既水杯,  一見傾心, 所以又買左啦, 哈哈.

最後一份聖誕禮物最實用, 因為係食物, 馬卡龍, 仔仔話想我整好耐, 不過未能成功過, 見市集有得賣, 就選了顏色鮮豔既盒裝版, 一盒三隻味, 同仔仔一同分享. 
希望大家有個愉快既聖誕假期. 🎁

提前的聖誕禮物 1

哈哈, 記得上年提前收到的聖誕禮物係小B既來臨, 今年自己比較繁忙, 終於可以休息下, 所以買左小小禮物獎勵下自己, 來個提前收聖誕禮物 (treat myself)

第一份係在手作市集買到的玻璃珠戒指, 圖案印有我喜歡既Peter rabbit (童話故事小兔) 第一眼看見已經好喜歡這個手作人既出品, 立刻停下腳步, 慢慢選擇買那件手作品回家. 佢有頸鏈同戒指, 檔主仲細心解說出處同其他款式可供選擇, 如果以前, 我一定選頸鏈, 但當我看到這個細小可愛戒指, 俾佢深深吸引住, 檔主話只有一隻同叫我帶上試試合身 (哎呀!Perfect fit! 完美, 我好少戒指合尺寸, 一係太細, 一係太大) 立刻拿銀包出來, 買返屋企, 小小既獎勵, 帶來大大喜悅. 💗

Melting Moments 雪球曲奇

過多三日就聖誕啦, 大家準備好禮物, 派對食物未? 今個星期我同仔仔整左個派對小食, 叫做 Melting moments (溶化時刻) 雪球曲奇. 
點解叫溶化時刻呢?因為這款曲奇係入口即溶, 我地第一次整, 但都覺得幾好食, 食完一個又一個. 用這個做派對小食幾好架, 外型迎節又好味, 做法仲好簡單添. 

食譜在這裡, 有興趣可以試試. 
http://www.mrspskitchen.net/melting-moments-雪球曲奇/

生日月

生日快樂啊小B, 這個月剛剛是小B二歲大既日子. 仲記得知道懷孕仲好似上個星期既事咁, 你出世時好細粒, 現在巳經係個頑皮搗蛋小人兒. 謝謝你帶來既歡樂, 希望可以每年同你一同過生辰, 每日看住你健健康康咁成長, 要做個快活人啊. 爸爸媽媽同哥哥都會永遠好錫你架, lots of love. 😘😘🎉
今年只是自己家食飯慶祝, 所以自己焗左個朱古力蛋糕俾佢. 希望小B你快高長大. 💗💗

桑寄生蛋茶

大家好嗎？聖誕節前幾個月對我同家人黎講係非常忙碌既時間, 感恩係令到我每天也很充實, 滿滿既正能量. 😊💗時間過得好快, 不足十日就是聖誕, 昨日終於暫時完成手頭上既工作, 今日可以休息下, 做返D小點心. 就是煲桑寄生蛋茶. 其實係有小B時, 巳經買左盒桑寄生, 不過遲遲到未行動去煲. 
最近見天氣凍, 谷友又有食譜, 所以今日煲了一大煲. 
細個時, 媽咪時常煲, 對我黎講桑寄生茶一點都不陌生, 可是小時候吾識寶 (最怕黑麻麻食物) 現在知道係好野黎, 久違既味道, 我喜歡加蛋同熱食, 你地又喜歡熱食還是凍飲呢? 🍵

蘋果三棗茶

天氣轉變, 之前兩個星期, 自己同家人排隊生病. 加上自己坐月時無做得咁好, 最近時時腰痛. 見到谷友介紹三棗茶, 家中剛剛有齊材料, 雪櫃仲有好多蘋果, 一於一齊放入個三棗茶, 所以昨晚煲左蘋果三棗茶. 女人真係要補補😊

三棗分別係蜜棗, 南棗同紅棗. 
蜜棗甜潤, 加南棗無咁燥, 紅棗補血。

做法: 南棗, 紅棗去核, 蘋果去皮去核.

大火煲滾轉細火煲半小時熄火焗15min。

好開心既一日

大家好, 好耐無更新個blog 啦! 上次發文都係中秋節既時候, 公私兩忙, 見今日有時間, 快快趣發文先. 其實我煮飯都有影相, 不過今日特別開心, 所以打尖出左先哈哈. 😉

開心事就係我盆蘭花有新B啦, 又出新芽. (老公前日話我知, 不過我仲估估下, 覺得似根多, 今早證實係芽）🎉🎉

第二件開心事, 從有小B既出世以後, 對自己既打扮已經接近放棄, 素顏加亂頭, 日日如事, 好悶又無精神咁. 今早起身, 同自己講要打扮下(週末愉快 happy weekend) 所以襯小B睡覺時, 化個妝, 個頭整個髻，個人立即精神晒。😁

出街同大仔買新衫, 等佢試衫時, 見到對面女裝鞋幾靚喎, 睇中左對短靴. (家中無短靴, 自己一向對短靴印象麻麻地）今次一試, 仔仔同我都覺得吾錯, 價錢仲ok, 大約hk 70元. 仔仔話對新鞋同今日個髮型好襯啊, 哈哈, 女人真係心情好又買鞋, 咩時候都買鞋. 💗

影左張全身相俾大家睇, 請跳過個大肚腩 (並不是有喜, 只是未修身姐, 嘩哈哈😂)

叉燒飯

祝大家中秋節快樂! 
今年簡簡單單整左叉燒飯當慶祝中秋節, 因為最近比較忙, 天氣熱又吾想煮咁多, 所以用焗爐焗叉燒, 煎隻蛋, 加條菜, 多飯版就食得啦. 😘
次次整叉燒, 仔仔都會食好多, 話媽咪整既叉燒好味道. (其實佢食肉既份量一向麻麻地, 同樣係豬頸肉, 都要好耐先食完, 難得佢喜歡, 所以每次開爐都預多份豬頸肉, 有淨做叉燒炒蛋又好, 炒飯都好架)

燉牛肉 Casserole beef

好想好想食牛肉, 見超市有一粒粒既普通牛肉粒 (完全吾知邊個部分, 不過做跟特價, 見到有D肥膏, 就買左盒試試) 最方便既做法就係燉牛肉, 將紅蘿蔔加洋蔥切粒, 再放入鍋炒香, 加牛肉粒炒到外面變色, 加調味粉 (D調味粉係超市買, 加凍水拌勻就用得) 之後將全部食物放入玻璃盆, 開焗爐焗1 1/2小時, 食得. 不用睇火又方便, 濃郁牛肉汁伴鬆軟既牛肉, 好食. 食譜教伴薯蓉, 不過我鐘意跟飯多D.
下次如果超市又有特價牛肉, 會買多D, 一次過整定D, 到時想食返熱就ok. 

雪菜火鴨絲炆米

之前睇肥媽教用火鴨絲做餸, 記得雪櫃有半隻鴨, 又找到包雪菜, 咁晚餐一於食雪菜，火鴨絲炆米啦. 以前返工, 茶餐廳午餐多做叫這個食, 不過有時好油. 自己整可以乾身D, 不過就好易碎, 我有時仲喜歡加辣椒油, 仲正...哈哈. 😂😂

花膠紅棗燉鮮奶

天氣乾燥, 又係時候煲D湯水滋潤下. 上次去西貢幫個婆婆買左D花膠筒, 細細隻, 分左D出黎整左個花膠紅棗燉鮮奶. 

第一次整, 用左個燜燒壺整. 早上整仔仔返學回家後, 之後就放材料整, 中午食完午飯就有得食啦. 

D花膠煲到溶溶地, 黏嘴, 牛奶又有紅棗味, 好正, 入秋首選滋潤湯水.

材料：
花膠 40克
紅棗 2粒
全脂鮮奶 236毫升
迷你冰糖 5粒

步驟：
(1) 花膠需用薑䓤出水，剪成細塊備用。
(2) 將紅棗洗淨，去核備用。
(3) 將350毫升的100℃熱水注入燜燒壺中暖壺約10分鐘左右。
(4) 用中火煲牛奶至出煙。
(5) 加入紅棗、花膠煲至見泡後，轉細火再煲10分鐘。
(6) 倒去燜燒壺入面D水後，即放入迷你冰糖。
(7) 入壺前轉中火見泡起，即入壺。
(9) 焗約5小時後可食用。

蕃茄飯

放完暑假, 現在大仔返學, 小B跟我在家既時間比較多, 有時午餐吾知煮咩 (小B現在同我地食相同食物) 上星期買左蕃茄煲湯, 見有多蕃茄淨, 一於整電飯煲蕃茄飯啦.

這個飯又快又好食, 上午小B睡午覺前將一杯米加入電飯煲, 放入八分滿水 (因蕃茄有水份), 加鹽, 少許糖, 胡椒粉, 肉少許 (今次加左三文魚碎）同一個蕃茄放中間 (個蕃茄切走個頭, 背部切個十字, 方便熟D), 等D米煮熟就食得. 

這個就是我同小B今日既午餐, 佢都食得好快下, 其實之前Facebook 谷友瘋轉過, 自己也有試, 不過大仔怕食蕃茄所以無再整, 我好喜歡這個方法, 現在午飯會煮多D. 

白朱古力曲奇

大仔放最後一日暑假, 無野做, 咁一於整野食親子活動下啦.

原本想焗麵包, 蛋糕. 不過仔仔最後選左曲奇, 仲要加佢最愛既白朱古力粒粒.

跟這個食譜, 可以做到大約十五個細曲奇. 我無跟足食譜, 糖放少D, 其實都夠甜架, 自製好處係可以少甜, 感覺健康D. 一出爐, 我都忍不住食左三個, 新鮮好好食呢! 

食譜:

75g 牛油

80g 糖

1 隻細蛋

113g 中筋麵粉 (plain flour)

1/4 茶匙 鹽

100g 朱古力粒粒

可以做到十五個細

完成啦！

BB 被完成啦！謝謝大家既留言, 這張BB被比我想像中更易鈎, 所以可以用好短既時間完成.

出來既效果, 我好喜歡, 花紋同顏色都好配合. 難處只有收尾比較多 (因要換間色), 花左我一個鐘頭先收好尾. 

外圍用左黃色同白色, 所以男仔或者女仔BB都可以用. (不過有D媽媽話, 有粉紅色, 男仔用麻麻地) 其實我都明白, 之前鈎這張BB被有粉紅色同粉橙色, 比細仔用時, D 婆婆走過黎話個BB女好可愛喎! >.<

好開心, 現在又可以開始另一個新項目啦. 😘

新圖樣 new pattern

最近比較忙, 見昨晚有時間, 試下鈎個新圖樣, 這個pattern D花式好特別, 又易做.
我起左114針, 個圖話會有36" 大, 大約一張bb 被size. 顏色用家中有既粉色系列, 出來效果好soft,  好柔和. (我原本想用實色 solid colours) 不過還是喜歡粉色系列多D.

福建炒飯

上個星期買左D急凍蝦仁, 見雪櫃有盒雞肉, 一於整福建炒飯, 食譜話要用乾瑤柱, 不過仔仔吾鐘意食, 所以只加冬菇, 雖然材料係少左, 但一樣好味道.

加個雞蛋炒飯底, 放餸上面, 懷舊又好味既碟頭飯就成為我地既晚餐啦.

小火龍同傑尼龜

大家有無玩Pokemon Go 啊? 我仔仔就無玩, 不過就好喜歡小精靈既角色. 所以係網上見到有鈎圖可以整公仔, 仔仔就好雀躍, 選左兩款圖案簡單, 家中毛冷顏色又有既存貨, 做左兩隻小精靈, 分別係小火龍加傑尼龜. 

用左三日時間完成, 簡單又快趣,

不過仔仔問我點解一隻瘦一隻肥喎? 

我話個鈎圖係咁喎!?

仔仔指住個圖 (佢房有張海報), 拿! 媽咪你睇, 這個公仔太肥啊! 佢食左太多棉花啦!!

哎呀! 好啦, 媽咪下次會跟著個圖案做, 吾會食肥隻公仔架啦!!哈哈! >.<

迷你乳酪薄戟 Mini Yogurt Pancake

現在有時小B同仔仔早餐吾知食咩好, 係Pinterest到見到有媽媽教整乳酪薄戟, 見雪櫃有齊材料就開工試試先, 想快手D又吾洗睇火, 最好既方法就係用個棒棒蛋糕機 cake pop maker.

之前已經用過這個機整迷你香蕉薄戟, 今次做法一樣, 只係改左食譜, 用乳酪做薄戟, 口感軟棉棉, 仲好香果味 (我用左士多啤梨味乳酪) 放八成粉漿入機, 等三分半鐘, 時間剛剛好. 

這個份量可以做到三底, 大約36個迷你pancakes.

- 90g of all-purpose flour / plain flour
- 1 medium eggs
- 25g of melted butter
- 136ml of milk
- 25g of granulated sugar
- 1/4 teaspoon of salt
- 1.5 teaspoons of baking powder 
- 47g yogurt

迷你薄餅 Mini pizza + 午餐

仔仔放暑假, 所以留在家中既時間比較多, 見雪櫃有香腸同磨菇. 於是一早用麵包機做薄餅麵團, 將麵團一開二, 半份大仔食, 另外半份整迷你薄餅比小B食. 用左淨番既麵團包腸仔, 來做個迷你腸仔包版自己食.

大仔食晒4件薄餅, 小B都好喜歡食迷你pizza, 這款食物可以整多D, 小B吾食飯時, pizza焗番熱就食得, 夠哂方便. ^^

食譜: 這個份量可以做到一個大pizza, 或者 七個迷你pizza

高筋麵粉 150克
水    100ml
鹽.   半茶匙
酵母 半茶匙

一鴨兩食

上次超市有光鴨做跟特價, 又買隻回來試試整燒鴨. 不過自己又想食滷水鴨, 所以張隻鴨分開左一半. 到這個星期六就用烤爐燒半邊鴨, 跟這個食譜 : 港式燒鴨
見用開焗爐, 跟手焗隻雞, 時日晚餐有燒鴨燒雞伴油菜. 

食譜係原隻鴨加醃料醃一晚, 但我只有半隻燒鴨, 所以D肉吾夠入味. ( 其實今次都好食, 不過如果再整都係原隻燒鴨會比較好)

而另外個半隻鴨用左這個做法, 滷水鴨, 味道幾好, 可以再整.

小B & 南瓜饅頭

記錄一下小B既近況, 最近小B出跟大牙, 仲要一次過出四隻, 好痛痛呢, 加上天氣熱, 對飯無咩胃口, 所以都係食其他食物多. 而且現在佢對finger food (即自己用手拿起一D細小既食物自己放入口) 覺得自己好成功, 所以常常要求用手食.

上次我煮蒸餸, 跟手蒸熱番兩個饅頭, 小B個日對飯無興趣, 所以俾左小小饅頭佢試, 之後佢自己將個饅頭用手食, 食完一個仲叫我地俾多D佢. 所以星期一去超市買左個南瓜, 今日有時間, 用麵包機搓粉, 再自己造造型, 做左八個饅頭.

跟張媽媽饅頭做法, 用焗爐紙剪圓形, 中間剪D孔排氣, 這個方法好好呢! 我之前係剪一小片紙放入蒸籠, 但饅頭蒸好後會變大, 所以有時會黏住左個底. 雖然賣相麻麻, 但味道係OK既, 整多幾個放入雪櫃, 要食時番熱就可以, 好方便.

 

見其他媽媽俾果汁BB飲, 咪又比小B試試, 佢現在識自己用吸管啦 (之前俾維他奶佢飲都仲未識, 今個月剛剛識啦) 同這個星期開始對綠色既菜有反應, 吾喜歡食菜呢. >.<

好彩佢喜歡食生果, 萍果, 提子, 橙, 柑都可以, 所以餐與餐之間俾D生果佢食平衡番. 下次試下俾西瓜, 睇下佢又鐘吾鐘意先. ^^

鴛鴦炒飯

細個果時係酒樓, 家人好喜歡叫鴛鴦炒飯食, 因為一次過可以有兩個口味. (白汁同茄汁)

現在仔仔開始大個, 想同佢分享下兒時回憶同懷念一下這個美食, 所以昨晚就整左鴛鴦炒飯. 

白汁係蝦仁加菠菜 (傳統係青豆, 不過我見D菠菜放左好耐要食, 所以跟手煮左佢)

茄汁係洋蔥加雞絲, 兩個味道都好好, 不過仔仔偏好茄汁炒飯多D, 這個又易整又快趣, 下次D蝦仁大減價可以再煮. ;)

寵物小精靈

近來大熱既寵物小精靈, 仔仔有佢地既遊戲咭, 玩具公仔就無咩, 只有以前係麥當當送既玩具. 最近仔仔問我可吾可以鈎個小精靈俾佢, 但近來比較忙, 所以就鈎左個簡易版, 波波.

只要二個鐘頭多D就完成啦, 不完美, (因我係早辰五點半開始整, 未睡醒既情況下完成, 下次要留意番) 不過仔仔收貨, 仲下order訂單下次整其他公仔.

見到佢收到咁開心, 好啦, 遲D有多D時間整俾你啦. ;)

綠豆爽

上次整食物時浸多左D半邊綠豆, 係網上睇下可以整D咩, 原來可以整綠豆爽.

 其實我吾知咩黎, 因為未食過, 不過食譜話要西米露, 屋企有, 片糖有, 我仲加左D生薏米 (增加口感). 

出來又OK 喎, 可惜只有自己欣賞, 家人吾好, 只好自己一個人分兩次食晒佢, 我都係喜歡熱食多D, 凍太糊口, 可能要放多D湯水先得. 

開花啦!

這幾個星期都比較忙, 所以小左寫卜, 現在有小小時間寫低做個記錄先.

兩個星期前我第二盆蘭花已經開晒花蕊, 所以同之前個盆黎張大合照, 兩盆都好靚仔, 謝謝你地帶來既快樂, 每日見住你地咁靚, 人都開朗D呢. ❤️

豆腐花 (免石膏粉)

大熱天時想食D涼浸浸既甜品, 這個凍豆腐花係個不錯既選擇. 自己本身好喜歡食豆腐花, 以前去飲茶一定叫番碗食. 最近谷友分享左豆腐花既食譜, 係免石膏粉, 覺得可以一試, 所以昨晚立刻開工. 這個食譜係凍食, 因只用魚膠粉, 現在天氣最合適. 食譜話雪四個鐘頭就可以, 不過我雪左過夜, 今日午飯食左碗, 正, 好滑, 食完好涼爽. :)

料理簡單, 1-2 人份量

豆漿 (我選左無糖) 400 毫升
魚膠粉     4 克
糖             適量 (我落左兩茶匙)

海洋

天氣好好啊, 好想去海邊玩, 現在去吾到, 咁不如鉤D小東西玩下先. 
這個海星同小龜仔好簡單又可愛, 做胸針或者扣在袋上都好有夏天感覺, summer feeling 呢! 

芝士焗墨西哥卷

最近好忙碌, 今日先有時間整理這個blog, 咁就出食物相先啦.

上次係谷友到見到佢地食墨西哥卷 (家中剛剛好淨番兩片, 但我地兩大一小吾夠分), 所以想左個新煮法.

先煲一嘜米, (上次燒烤食淨四隻BBQ 燒烤醬雞腿仔, 放入電飯煲同D飯一齊煮熟) 跟手炒D蔬菜 (磨菇加紅青椒) 當飯好後, 雞拆肉同其他材料炒個飯. 最後放入墨西哥餅卷成墨西哥卷, 上面放鮮茄醬同芝士焗二十分鐘等芝士溶, 食得.

我怕吾夠食, 仲焗左D薯條, 不過其實可以不要, 因個墨西哥卷已經好大份同足料, 好好味又可以清下個雪櫃, 一石二鳥.

火雞肉丸

見到Blogger Li J 整肉丸好味道, 所以想試試, 今個星期有時間, 去買包火雞肉碎回家. (選火雞因肉味無咁大, 豬肉碎試過肉味太腥, 牛肉家人麻麻, 但超市又無雞肉碎. )

今次份量得500g, 少少地試試先. 出來效果好好, 好似街買咁彈牙, 好味道, 謝謝Li J 分享食譜. 昨日整左碗公仔麵伴火雞丸加菜心, 下次食湯麵可以有多D餸啦。

油角仔

個電腦用到吾夠位, 所以清跟D舊資料, 發現這幾張舊相, 咁一於紀錄一下先. 

其實這些相係新年時影, 不過太忙忘記左佢地, 這些油角仔係用特別既方法整. 不是炸而是用焗, 可能因為這個原因, 所以無咁酥, 但都好食, 少D油方便D煮, ok 架. 

日式照燒汁鯖魚

好多日本餐廳都有鯖魚定食, 我本身麻麻地好這款魚. 今日見超市有減價貨, 就買番份試試. 出面通常食鹽燒, 不過我吾想咁乾身, 用左日式照燒汁做法, 用焗爐焗 (不是煎)出來既效果幾好, 又方便, 會再食. 放入已預熱焗爐, 180度焗8分鐘，反轉，再焗8分鐘，中途塗照燒汁3-4次.

照燒汁：
日本醬油     1湯匙
味醂     1湯匙
糖     1湯匙
生粉   1茶匙

菠蘿咕嚕肉

仔仔話想食咕嚕肉, 所以拿左雞扒出來整左昨晚既晚餐. 這碟係我既, 少飯少餸 (減肥中, 又想影相靚D, 所以用左大碟擺.) 今次個個都食碟頭飯, 放心佢地個碟大好多架。

三文魚三食

上星期六係街見到有三文魚頭連三文魚骨賣, 好想飲魚湯, 就買左份回家.
原來拆開有好多野, 見blogger 整三文魚骨, 於是用相似方法整左三食.

首先煎香三文魚骨, 之後拆肉作炒飯. 放番魚骨加蕃茄煲湯. 魚頭太大, 整左豉汁蒸魚雲, 魚雲滑滑又入味, 好食. 這餐慳家又好味, very good. :)

椒鹽豬扒湯麵

拿左豬扒出來解凍, 原本想整洋蔥煎豬扒, 發現仔仔學校有節目, 遲D先要接放學. 難得時間可以同老公撐撎腳, 又想食少少辡既餸, 一於改煮椒鹽豬扒湯麵二人前.

只要將豬扒用椒鹽 (鹽加五香粉)醃肉, 將豬扒半煎炸, 最後加上辡椒, 辡辡地好惹味. 

泰式芒果椰汁糯米飯

整左啦! 整左啦! 時日甜品, 泰式芒果椰汁飯.

話說見到谷友包糭, 終於買左包糯米回家, 但未有動力包住. 上次煮左綠咖哩淨番半罐椰奶, 於是第二日去超市買個新鮮芒果, 整左這款甜品. 

這個份量係一杯糯米, 用電飯煲煮熟, 椰奶加糖, 小小鹽煮勻, 放椰漿落糯米, 拌勻, 切好芒果伴碟, 完成.

食後感: 係好味道, 不過好難消化. 這個係二人份量, 但最後我地都食淨半碟. 可能年紀大左, 以前可以早餐食大X活巨型糯米雞都無事. 講開糯米雞, 應該係下次挑戰既項目啦! 

蔥油餅+椰撻

上個星期見有時間, 自家種既蔥生長得好盛放, 所以剪D出來食, 最方便既方法就係整蔥油餅啦. 一次過整幾份, 有多放入冰箱, 食前一晚回溫, 作早餐或茶點都適合.

好想食甜點 (雖然減肥中, 不過都係食完再算) 上次做雞尾包淨番大半包椰絲, 一於整椰撻啦. 可能介口好耐, 再次食番這個懷舊甜點, 覺得好好味. 仔仔喜歡食雞尾包, 以為佢會喜歡椰撻, 不過佢話麻麻地, 應該有排吾會再整啦, 得我地兩公婆, 食左好多日先清晒呢!

素食

綠色星期一, 所以晚飯煮素食? 

其實係因為見到blogger整甜酸齊, 突然掛住想食, 所以快快趣趣買包油麵筋今日整. 找下食譜, 發現原來素鴨都好易整, 咁一於用腐竹整番個試試. 

素鴨先剪外圍腐竹, 煮汁料, 放入外圍腐竹浸透, 之後卷上腐竹, 蒸十分鐘, 再煎, 最後用淨番個汁料收汁, 可以上碟.

試食後, 覺得素鴨加D蔬菜可能會好食D, 下次試試. 

自家薄餅

好想食薄餅, 其實去超市買現成薄餅都好方便, 行大約十五分鐘就到超市, 選擇又多。但最後決定自家整, 一來可以清下雪櫃食材, 又可以玩下麵團, 自己整仲可以放多多料. (仔仔話要多芝士)

不過今次做吾到薄底, (我用麵包機搓麵團, 但多手放入雪櫃, 佢自行再發酵多次, 仲好勁個隻)所以點搓都變吾到薄底, 好彩厚底都好食!

我用左300克高筋粉, 可以做到兩個偏大型薄餅, 兩個大人加一個小朋友, 份量剛剛好. 原本想整D伴菜, 好彩無整 (仲減肥計劃中, 吾好食咁飽), 仔仔知道食薄餅好開心呢, 我都開心, 有得食又有得玩, 週末愉快!

紅酒炆牛尾

朋友家作客, 試左佢既牛腩煲, 好味道. 但係街買吾到靚牛腩, 見肉檔有牛尾賣, 好耐無自己整, 咁今晚既晚餐知道食咩啦.

上網找食譜有個紅酒炆牛尾, 剛剛家中有支細紅酒, 買D紅蘿蔔, 磨菇, 洋蔥, 可以開工啦. 炆左三個鐘, 出來好入味, 肉好淋, 伴飯或意粉都得. 

蘭花兩盆

在新年時份, 第一盆蘭花已經盛放得很美, 兩個多月既時間, 還是美麗動人. 

另一盆蘭花, 也靜靜地生出花菖, 今次分枝比較多, 有三枝. 細心睇, 原來仲有第四支準備出跟, 但怕他生得太多, 所以俾左支肥仔水佢, 希望可以幫補下啦!