Last bake of year 朱古力曲奇

仔仔放假, 最好既親子節目, 就係一齊整野食啦. 今次整仔仔最喜歡既曲奇, 係網上見到個食譜好易做, 不過無跟足個食譜, 只係做左一半份量. (因為吾夠牛油, 同聖誕節太多野食, 所以留肚食其他野)

這個份量可以做到十二個曲奇, 仔仔鐘意食朱古力, 所以個曲奇餡有朱古力粒粒. (小插曲: 仔仔話幫手整碎D朱古力, 但大力過頭, 包朱古力飛晒出黎, 一地都係. 好彩上次整曲奇棒棒有淨朱古力 ;p)

這款曲奇係英國好出名, 叫做Millie cookies. 我地個結婚週年都係食這間曲奇. 不過我個人認為甜左D, 要配忌廉一齊食中和番. 反而仔仔就大愛, 仲食左幾塊添. ^^

聖誕晚餐

各位聖誕快樂啊! 你們有咩節目啊? 記得有左仔仔之後, 自製聖誕晚餐就係我地家每年既傳統, 已經有4年多啦! 年年都整D吾同既食材, 好似火雞, 豬手等... 今年試下新野 3birds dinner, 三種雀鳥, 就係火雞包雞肉同鴨. 係超市買回來, 放入焗爐3 個鐘頭後, 加D蔬菜, 食得. 好多肉啊, 食完飽曬. 今年小B 食薯蓉, 期待下年加上小B 一齊食大餐呢! 

小小兵曲奇棒 Minions cookies pop

大家好嗎? 好耐無寫blog 啦, 因為快到聖誕節, 就比較忙碌. 加上十一月自己病左, 咳左好耐, 好番之後又大傷風, 所以無咩精神探同寫blog.

現在時間鬆動D, 快快手寫番篇先. 今次主題係小小兵曲奇棒, 因為仔仔學校有活動, 希望家長做一些蛋糕, 曲奇作義賣. 我仔仔好喜歡小小兵, 所以做左這個主意. 原本想整蛋糕, 但無時間做, 因要用糖皮做小小兵, 工程好大, 所以放棄左. 

見facebook有人整曲奇棒, 上YouTube 睇下, 好易整又新鮮 (哈哈, 自己未整過, 所以好有興趣整) 係屋企有齊材料, 欠白朱古力同黃色色素, 立刻去街買完, 接左仔仔放學就立刻整. 

不過好耐無整溶朱古力, 頭兩次都失敗左, 同老公參考下, 先知原本吾可以太大火, (好彩我買左4包白朱古力咋) 完成曬大約用左5個幾鐘, 不過整完, 自己同仔仔都好喜歡. 當日義賣仲好成功, 好快賣曬, 好開心啊, 哈哈. :)

菠蘿包

仔仔這個星期一話想食自家菠蘿包, 所以見星期三有時間, 早上煮粥, 跟手放材料入麵包機, 之後就帶大仔返學, 回來一陣麵團就好啦. 

午餐前焗轉麵包, 不過焗燶左一半, 所以今日又整多轉, 今次好D, 無燶, 不過上色麻麻, 因我無上蛋汁係面, 費事再打多隻蛋, 下次用牛奶試試先. 

一整好, 立刻食番個, 加牛油係入面, 正正正, 好耐無咁食啦, 加杯奶茶, 完美既下午茶呢! 

毛冷球

這個星期買左新手作玩具, 就係pom pom maker, 毛冷球工具. 好好玩呢, 仔仔放學回來見到就話要立刻玩, 所以食完晚飯就試玩.

整左個單色, 粉藍波波, 仔仔話想試下混色, 於是整左四隻毛冷色. 幾得意喎, 又好玩. 個藍色用左黎整冷帽. 一盒有四個尺碼, 大中細, 迷你. 我見過有整心型波波工具, 不過原來這四個普通版都整到, 搵日試試先. 

打尖

其實最近都有影相, 煮飯, 不過未有時間放上來. 今晚整煮左個好耐無食又好想食既野, 所以打尖寫左這個先.

登登登登... 就係午餐肉啦. 平常都會放幾罐在家作後備. 但今日好想食啊, 所以開左個用來炒飯.

仔仔一邊話好食, 一邊話好似好耐無食啦! 諗諗, 原來有一年無食過呢. 因為家中雪櫃存貨多, 所以最後都無選午餐肉作餸.

 記得以前細個打風, 先有罐頭食. 現在物資豐富, 罐頭已經係次選, 不過我家中永遠也會入午餐肉, 可能下次用來整午餐肉包都好喎. ^^

青椒咕嚕肉

好耐無開爐炸野啦, 見D腩排靚, 買左D回家整咕嚕肉.

問仔仔想食青椒還是菠蘿, 佢話吾想食水果, 不過我煮完先諗起, 佢吾食, 不過我地兩公婆可以自己食架, 一於下次兩樣都買.

這個餸甜甜酸酸, 好開胃架, 仔仔食左好多飯呢!

1. 茄汁                 4湯匙
2. 生抽                 1湯匙
3. 老抽                 1湯匙
4. 白醋                 1湯匙
5. 糖                     4茶匙
6. 水                     大半碗
7. 鹽和胡椒粉      少許

叉燒包

上次講到我整左蜜汁叉燒之後有下文, 恭喜估中既bloggers, 無錯, 我整左叉燒包啦! 

因為每次同仔仔食點心, 佢一定要叫叉燒包, 所以今次自己試下整, 又ok 喎, 雖然個樣麻麻地, 但好食. 今日仔仔話要個來做早餐, 一個帶回學校食. 

我會整定多D放係雪櫃, 用來做茶點都幾好架. 

菜遠牛肚河

上星期行街, 俾我發現左有新鮮牛肚賣, 買左800g, 於是回家整鹵水牛肚. 

未試過煮新鮮牛肚, 以前買冷藏, 所以吾知點處理, 所以上網找方法. 原來要用紹興酒, 係超市找到一大一細支, 但好大支, 成支豉油咁大, 用吾曬喎, 心大心細, 最後決定買支細, 好彩買細, 原來都用吾完.

昨晚煮完, 今日整左這個牛肚河, 加菜心同蛋, 好耐無咁食啦, 正正正. 

祝大家中秋節快樂!

祝大家中秋節快樂! 大家做左節未?

今日到我地自己家做節, 吾出街食, 決定自己煮. 兩個大人, 一個細路, 加個B ( 佢無食我地D野架, 佢有佢食粥仔同望住我地食咋, 哈哈)

煮左五碟餸, 加個栗米紅蘿蔔花膠湯, 啖湯好濃同花膠味. 五碟好似好多, 其實細細碟咋.

我都係煮D快手野, 蝦仁炒蛋, 清炒時蔬, 磨菇雞柳, 買左焗魚, 煮個栗米汁就係栗米魚柳, 這次連D湯渣都用來煮餸, 個花膠同豬展, 加D生菜蠔油又一碟.

食完個個都話飽, 因為清曬. 咁D月餅可以遲D先食啦... 哈哈. :)

又開工啦!

上次整完16個奶黃月餅後, 

反應好好, 好快已經食曬. 

所以再開工, 又整多28個, 全部都係奶黃酥皮月餅. 

有經驗後, 這次月餅更上色, 少左裂紋, 自己都好滿意, 這次應該夠食啦. :)

蜜汁叉燒

今日去超市買左豬頸肉, 所以又買左李錦記叉燒醬同海鮮醬, 來個快手焗叉燒.

材料: 李錦記叉燒醬2湯匙、海鮮醬1湯匙、蠔油1湯匙, 老抽半湯匙, 蜜糖1湯匙

做法: 預熱焗爐200度15分鐘, 焗20分鐘後，反轉焗另一面15分鐘

我整定多D, 放入冰格, 食時才拿出來, 想食立刻有, 好方便. :) 

D叉燒仲有下文架, 遲D講, 大家應該估到我用叉燒黎整咩食物既. ^^

清潤湯水

這個星期好忙碌, BB去健康院做評估, 因姑娘俾錯資料 (BB早產, 應該做7個月評估, 不是8個月) 所以遲D要做多次.

之後大仔話想跟朋友仔學街頭跳舞 (street dance), 所以安排左試堂, 見佢都玩得好開心, 所以每個星期五放學後就參加.

見老公有D口乾, 去超市買左個木瓜, 加雪耳豬展, 蜜棗, 煲左這個清潤湯, 果D雪耳同木瓜都好正啊, 我平時都好少食湯料, 不過今次有我同老公喜歡既雪耳, 我就食木瓜, 老公就食豬展, 全部湯料清曬. 吾知點解, 我地煲完湯, 個舊豬肉好淋, 老公次次都話要食. 仲想留黎做肉鬆都吾得呢. :p

脆皮奶黃月餅

日日上facebook 見好多谷友整月餅, 手痕呢, 所以這兩晚等仔仔們睡覺既自由時間整下月餅先. 上年整左冰皮兔仔月餅, 但留吾到好多日, 皮會不好食. 所以今次注攻奶黃月餅, 仔仔大愛這款月餅, 今早老公俾左個仔仔試, 佢話好好食, 聽到心都甜曬呢!

我用50克月餅模整左16個月餅, 但今次只要幾個靚仔, 其他個面都糊左, 不過我已經好開心, 自己食, 不是送人, 吾怕啦!哈哈. 

多謝blogger高Ling 既食譜, 有指引又詳細既提示, 我仲有材料淨, 可能遲D會再做多轉. :)

http://linglingkitchen125.blogspot.co.uk/2014/08/blog-post_22.html#more

無蛋白麵包

早前谷友介紹無蛋麵包, 昨晚叫老公拿個麵包機出黎,

今日買左酵母, 煮晚飯前先預備材料入麵包機, 按麵團鈕, 等1個鐘頭半自己發酵一次, 再入焗爐作最後發酵.

出來好靚, 脹卜卜. 一出爐外脆內軟, 幾好食喎. 我有成兩年無整包包啦, 今日好彩都無失手, 重點係這個包包無用蛋架, 所以俾BB食都得.

這個食譜係半磅白麵包

高粉280g
糖14g
鹽4g
酵母5g
牛油14g
水180g

洋蔥豬扒飯

今次老公出手做大廚, 哈哈, 我又放假一天, 不用煮飯.

佢煮左自己最拿手既洋蔥豬扒飯, 好好食架,

首先炒洋蔥, 跟著煎豬扒, 煎到脆身, 加番個汁, 完成.

每次整這個飯, 我地一定煮多D米, 這個碟頭飯真係very good. :) 

小小兵 Minion

仔仔好友話想同仔仔一齊去睇小小兵, 於是週末去左睇. 仔仔想多謝朋友仔既邀請, 所以自己用奇趣蛋既波波, 加眼同身, 畫D頭髮同細節, 哈哈, 完成這個小小兵不倒翁啦. :) 

一人前午餐

BB日日煲粥仔俾佢食, 

所以變左我都有粥做午餐, 

一碗仔吾夠飽, 

出來後院收D韮菜, 

加D麵粉, 煎個薄餐, 

再加幾隻餃子, 飽飽啦.

章魚燒 (小丸子)

睇番個blog先發現上次整章魚小丸子原本係一年前既事啦.

家人分左D章魚腳俾我做炸魷魚鬚, 不過我吾想炸, 所以切粒做小丸子.

除左魷魚, 仲有菜同腸仔係中間.

太耐無煮, 第一次加粉糊太多, 變左個波. (但中間無料) 有經驗後就越做越好.

今日心靈同身靈都好滿足. ❤️

BB 粥

BB現在八個多月, 食左一個月糊仔, 情況吾理想.

奶奶煲個一次粥仔俾BB, 發現原本小B鍾意食杰身食物. 所以奶奶教左我煲粥. 我以前用燜燒杯, 煲出來既粥仔會開曬花, 但係就吾綿, 要另外用小鍋再煮多5分鐘, 而且保溫麻麻, 5點鍾食晚餐要反熱多次, 所以覺得效果麻麻. 

奶奶既方法係用真空壺, 直接加水, 米 (一碗水, 3湯匙米) 入壺加熱在爐上, 煮到水滾就加肉片吊味, 煮多陣就可以放番入個壺內. 煲完午餐時拿起要食既份量, 有淨留番晚餐. 我一次過煮兩餐份量, 晚餐食温度剛剛好. 這個方法煲少少都可以.

現在日日早上煲粥仔俾BB, 食左一個星期, 可以食到細BB半碗, 今日第一次食魚粥, 食得ok 喎, 我覺得幾香, 希望BB日後可以加油食好D. 

大阪燒

上次食完韓國餐廳既大阪燒, 老公對佢念念不忘.

所以買左包大阪燒方便粉回來做, 好食喎. 不過食完無再買.

這個星期老公話想食, 於是上網找尋食譜, 原來很易整, 用普通麵粉就ok 啦.

這次我加左煙肉, 香口又好味. 有興趣可以玩下.

材料:
蟹柳 - 180克
椰菜 - 180克
蛋 - 2隻
鹽 - 2/4茶匙
麵粉 - 180毫升
水 - 120毫升

醬料：
日式燒餅汁、蛋黃醬、鰹魚碎、紫菜碎
(全部適量)


點樣煮
1. 先將蟹柳、椰菜切絲備用。
2. 將雞蛋、鹽和水拌勻，篩入麵粉拌成粉漿。
3. 將椰菜絲、蟹柳絲放入粉漿中拌勻。
4. 放少許油燒熱鑊，下一湯穀燒餅粉漿，用細火煎至兩面熟透便可上碟。
5. 最後澆上燒餅汁、蛋黃醬、鰹魚碎、紫菜碎.

蝴蝶蘭花

我家盆蝴蝶蘭花真係好耐看呢,

在六月頭開花, 到現在將近八月尾花朵還是這樣美.

蘭花係我最喜歡既花之一, 相信這盆花可以開到三個多月花期呢.

感恩, 每日看見你, 人都開心D. 所以我好鼓勵人地種花, 又綠化, 這個興趣幾好架.

懶人之冷麵

哈哈, 好懶啊,

今日出左整日街, 回來吾想煮飯, 

快快手整個冷麵做晚餐. 

雪櫃有咩就煮咩, 

雞蛋, 火腿, 青瓜, 雞肉, 加壽桃牌麵, 

淋生抽同麻油,

食得啦! 

親子丼

有時吾知煮咩好, 

就會煮這款餸, 親子丼.

 因為家中雪櫃一定有雞蛋同洋蔥,

 伴肉一齊煮, 方便又好食. 

這個餸重點係加入味琳, 甜甜地好好味. 

牛油果刺身

好多bloggers到整左這個牛油果刺身, 

其實我本身對牛油果麻麻地, 

不過上胎懷孕時好想食三文魚

於是俾個機會牛油果.

 哈, 又得喎, 口感都好似三文魚, 加左芥辣用豉油, 大發現啊, 好好味道呢. 

所以現在有時間就會買個回家, 享受這個素食刺身. 

購物篇

星期六日出街, 要買番個新BB袋, 舊個果用左半年, 拉鍊位壞左, 入面個底又爆開左. 係玩具反斗城, BB店睇過, 都有睇中, 但就好貴, 一係個袋係布面做(想要防水布), 所以吾合適.

終於俾我找到這個BB袋, 又夠大, 又多格, 入面仲多左兩個水杯位, 這個設計我最愛, 所以買左佢回家.

今日又買左隻新平底鑊, 買左兩對毛毛襪, 其實係用來整手作用既. 又買左個新瓷器, 細細地用來整番熱BB食物時用, 顏色好靚, 仲有蓋, 非常好.

係bloggers到介紹這款BB口水肩, 佢既特別地方就係尾部係有軟牙膠, 可以俾BB用作牙膠用, 今日由我家小B試範, 牛仔look, 好型仔呢. ^^

最後買左個食物冰袋, 這個細好多, 日後用來放BB食物就最方便, 仲要有仔仔大愛既米奇, 今次真係大豐收啦. ❤️

這是誰?

上次係blogger EE到見到佢介紹Wally, 於是同仔仔去圖書館睇睇有冇佢既書可以借. 

仔仔大愛這個人物同書藉, 本來想買本俾佢, 不過這些書玩一兩次就吾玩, 所以都係借書好過.

其實我覺得這本書大小朋友都適合玩, 除左主角Wally, 仲有其他角色增加難度. 

我最鍾意找尋小物, 好似鎖匙, 書卷, 望遠鏡, 相機, 骨頭. 細細地, 真係幾難找, 不過找到又好開心. 

同仔仔一齊玩, 有傾有講, 好好既親子活動呢! ❤️

時令生果

其實我本身對今食生果麻麻鍾意, 但自從上胎懷孕, 就開始喜歡食生果啦! 

現在夏季時令既西瓜, 芒果都有買回家食. 最近買左D新鮮無花果, 以前會買好多回來自己食, 不過朋友有次話入面有蟲, 所以今次買D冇壞, 應該會好D. 

黃肉桃子又係好食, 不過我喜歡淋身, 會買左放幾日先食, BB都好喜歡食桃子. 

買左個牛油果同幾個蘋果, 牛油果BB上次試左一啖, 都OK, 不過其實我係買俾自己食, 想試試谷友話既刺身食法. 蘋果老公同仔仔分黎食. 細細個放入午餐盒好方便. 

無飯主婦

天氣熱, 今日午餐已經出左街食, (行街街好開心), 但忘記拿肉出來作晚餐, 又吾想煮. 所以去左超市買焗意粉, 老公話想食蒜蓉包, 有肉(意粉內有雞肉同煙肉), 買左包雜菜做伴菜, 先焗意粉, 最尾個五分鐘才加麵包, 快手炒個菜, blog友仔, 開飯啦! 

士多啤梨蛋白甜點 strawberry meringue

見士多啤梨靚, 買左D回家食, 但太多食吾曬, 所以係超市買左蛋白甜餅, 弄碎士多啤梨成沙冰加在甜餅上, 好味又靚靚. 用來做個快手甜品也不錯.

整Yakitori 焼き鳥

上次係街到試左食Yakitori 焼き鳥, 好好味.

 回家一於試下自家製, 有雞肉串, 豬腩片串, 雞肝串同燒飯團. 

去買左個細炭爐, 老公係後院燒, 一串串, 細細地, 初初都好快熟, 到整左一半個爐燒吾到, 所以轉番入屋焗.

 個醬汁跟出去食好似, 用100ml 豉油, 100ml味琳, 2茶匙糖, 煮沸跟住轉細火煮多5分鐘完成. 

smile emotico

寶寶副食品 椰菜花紅蘿蔔糊仔

時間過得真快, 轉眼間BB已經過左6個月大, 可以食副食品. 因BB係早產子, 所以姑娘建議遲少少才開始. 因此在BB 6個半月大嘗試俾小小米糊, 但BB 還小, 仲未識吞, 同一食米糊就哭, 所以停左一個星期再試, 這兩日又食得幾好. 

於是就找嬰兒食譜, 其實之前有試做冰粒, 但BB全部都吾俾面, 只食有甜味既香蕉. 同朋友傾, 話要找些咸點俾BB, 如果吾係大D只食甜. 

找到這個食譜好易做, 材料有一個紅蘿蔔, 100g椰菜花, 2茶匙米糊, 同少量芝士同適量水(我用蒸蔬菜餘下既水作高湯) 我試過味, 不是甜的, 有少少咸味, 因為有芝士. 

好期待啊, 終於到試食既時間啦. 解凍左一粒. 初初放入口, BB 俾左個好得意既樣, 因為試新野, 第一啖吾知咩黎, 好可愛. 今日食食下, 又ok喎, 食左半份, 10ml. 哈哈, 我就好開心啦, 自己整到BB既副食物, 健康D, 平D, 仲好有成功感呢!

老師小禮物

仔仔放暑假, 準備答謝老師辛苦教導, 所以買左盆家樂花同自製張心意卡俾老師. 自己用羊毛氈做左個蘋果心口針, 又用新買既英文字印仔做封面, 好好玩啊, 希望老師會喜歡啦! 

新手作用品

又shopping 啦, 現在真係好方便, 不用出街, 在家上網舒舒服服也可以買到野. 

今次買左英文字母印仔, 原本只係想印英文大楷, 點知睇睇下, 這套加多hk$20元, 就包括細楷同數字. 咁抵一於買曬佢啦. 

個果都幾靚, 有D復古感覺, 等我遲D試試效果點先! 

燜燒杯 - 紅豆沙

上次見blogger整紅豆沙, 好想食啊, 見到雪櫃有包紅豆, (上次整紅豆餅餘下的)所以今日食完午餐, 就用左個燜燒杯整左紅豆沙啦, 燜左兩個半鍾頭, 食得啦, 又少甜, 幾好喎. 下次試試綠豆沙先. 

朋友婚禮 wonderful weather wonderful wedding

終於到左朋友結婚既好日子啦! 新郎哥係個電視迷, 所以場地都有好多電視裝飾, 有好多紙版道具, 座位名單仲用左好多英國, 美國既電視戲名開玩笑. 而且新娘子精通法文, 鍾情法國, 所以結婚蛋糕用上英國名劇集Dr. who內公仔放在蛋糕上, 而外圍就用上主題顏色藍同粉紅色. 場地好靚啊, 睇得出兩人都花盡心思. 天公造美, 天氣好好, 婚禮也很完滿, 祝福佢地白頭到老, 永結同心. ❤️

下午茶餃子

同老公傾開傾, 發現佢有幾個外國人同事喜歡食小籠包, 睇睇食譜, 原來要用豬皮整啫喱, 等入面有湯. 怕自己做吾到, 於是上網睇下有無D簡單既中式小食. 餃子幾好喎. 今早買左材料, 食完午餐立刻開工. 
先醒粉, 跟住醃肉同菜 (我用豬肉加白菜仔), 只係跟食譜既一半份量麵粉, 整到16隻大大小小既餃子. 完成立刻煎當下午茶. 味道ok 喎, 因為吾係用大白菜粉, 所以顏色黃D. 試食後, 下次醃肉可以再重味D. 仔仔食完, 話想帶D返學當午餐, 無問題, 難得佢鐘意食, 但只淨番五隻, 所以會煮個炒面底, 今次用個燜燒罐入住, 希望可以保持到個熱度啦!

Maybelline lipstick 美寶蓮唇彩

其實我好少化妝, 由其生左2個之後, 更加少, 加上自己懶, 一年十隻手指數得曬化妝既次數, 但因為想係下月朋友婚禮影相時執番D眼耳口鼻見人, 所以今日去買左支唇彩回來. 我想買支唇膏, 但顏色找不到心水, 所以去左睇唇彩. 原來現在唇彩都有不脫色, 這支寫可以留在唇上長達24小時, 棗紅色加點閃粉, 幾靚喎.

回家立刻試試, 說明話唇彩塗在乾淨既嘴唇上, 等乾, 就可以加另一頭既唇蠟定型. 我等左5分鐘才上唇蠟. 好易用啊, 顏色又適合我, 今次都幾喜歡. 落妝又易, 暫時試左半日都無脫色, 下月去婚宴就吾怕D唇膏要時時補番啦!

補充: 今日用左全日, 發現要補多次唇彩, 可能食野飲野, 所以會退色, 不過都俾傳統既好.

Wonder core 萬達康 運動器材 - 減肥日記

又黎記錄一下我既減肥日記, 由4月21日開始減肥, 體重由57kg, 今日6月21日,磅重係50kg, 腰圍瘦左4吋, 用左2個月時間, 就減左7kg... 哈哈哈, 好開心啊, 真係想開香檳慶祝一番. 到左第一個小目標, 減到50kg, 第二個目標就係減到45kg. 其實現在明顯睇得出個肚腩係細左好多. 連老公都話我瘦左.

我用食物控制加做運動減肥, 運動方面真係要多謝老公支持, 佢買左這個運動器材回家, 主要係因為這個器材可以針對身體部分減肥. 而且一機可以做多個瘦身器材, 腰, 手臂, 腳. 其實我主要用這個機做瘦腰運動多, 所以只做了sit-up, 同踏單車. 其他番而好少做, 因我買左第一個星期時, 用錯力, 扭傷左條腰, 原來我第一次玩, 不用加重太多, 負荷太大. 現在知道, 會每日加多十下, 慢慢黎, 就好好多啦! 

昨晚試左條要去朋友婚姻既裙, 終於拉得上個拉連啦, 不過個手臂用大腿D肉仲好肥下, 要努力D先! 大家如果都減肥中, 一齊加油啦! Yeah!!!

完成鉤織被仔啦!

終於完成張新被仔啦! 今次用左三個幾星期就完成, 咁快手, 係一來張被仔細, 得24吋x23吋, (哈哈, 原本以為會大張D, 因我跟相鉤, 係無圖pattern, 所以吾知尺寸) 二來鉤開想快D完成, 所以用左小小應該睡覺既時間鉤, 每晚遲少少睡. 

自己好喜歡啊, 顏色同花紋都係第一次咁整, 謝謝谷友分享同介紹.今次外圍用左貝殼花紋, 簡單又容易. 我會放係車仔到, BB睡覺左可以當被仔用. 其實BB好適合用鉤織被仔架, 因為有細孔, 蓋住左BB都不怕, 不像傳統被仔. 我以前生左BB後, 個姑娘朋友都係介紹我用鉤織被仔架. ❤️

這個被仔有25個granny squares組成, 每個有三種主色鉤成一個好似花既圖案, 外圍用米白色併合. 睇相(圖) 時以為一個square(一片正方形)好細, 試鉤第一個先發現都好大個, 如果下次再鉤, 我會加多幾行, 應該會好D! ^^

Cholocate brownie 布朗尼

週末仔仔話想食甜品, 所以就買左包現成朱古力布朗尼回家整番個. 其實自己整材料都好簡單, 但一時間想食, 為有買現成, 加隻蛋, 水, 牛奶. 這個容易做, 仔仔一手一腳整, 玩得好開心.味道都ok, 又可以玩, 不過甜左少少.

Crochet granny square blanket 鉤織織片毛氊

哈哈, 上次俾大家睇個張貝殼花紋shell stitch 毛氊都未埋尾, 今個星期又開始新毛氊. 今次係granny square 鉤織片. 其實我本身對granny square麻麻地喜歡, 很多人學鉤織也是學granny square先, 但我第一件鉤物就跳級做公仔. 最近同谷友傾開計, 見佢地分享既granny square真係好靚, 心動啊! 所以心思思, 星期一開始, 每日做少少. 今日朋友仔接左仔仔去玩, bb 午睡時又做左D, 好喜歡有自己時間, 有小朋友既家長都知, 食飯有時都要九秒九食完, 所以很享受bb 午睡既時間, 一邊靜靜地聽下音樂, 一邊鉤織, 心情都開朗D. 

科學小火山

放假無野做, 仔仔話悶悶地, 於是上網睇睇有咩做, 係bloggers到發現左個小玩意, 就是科學小火山啦! 材料有梳打粉加醋, 屋企有齊材料, 立刻開工啦! Bloggers教加D食用顏色入去梳打粉中, 就可以有不同顏色火山, 但到玩時發覺吾夠用, 所以只用原材料.

但仔仔已經玩得好開心啦, 加少少梳打粉入杯, 倒醋入去, 咋一聲, 同好多泡泡出黎, 這個親子活動又好玩, 又平, 仔仔話有下次. (P.S.: 今次仔仔已經玩左半支醋啦, 哈哈)